SHILLONG: U Myntri ba khmih ia ka tnat jngohkai ka Jylla, u Bah Paul Lyngdoh ula kynthoh halor ka jingpyrshah ban pynkut ia ka Cherry Blossom Festival ha ka sngi U Blei, da kaba u la ong ba “Man ka sngi ka dei ka ‘Sngi ba Khuid’ bad sngi kyntang ym tang kawei ka Sngi.
Kane ka jingkynthoh kala mih hadien ba ka seng STIEH ka la pynpaw ka jingpyrshah bad bym iahap bana pynkut ia ka Shillong Cherry Blossom Festival ha ka sngi U Blei, ka sdang naduh ka 17 tarik bad yn pynkut pat ha ka 19 tarik Naiwieng, kaba dei ka Sngi U Blei, ha Bhoirymbong.
Haba iakren bad ki nongthoh khubor hynne ka sngi Balang, u Bah Paul uba dei ruh u nongaiktien ka Sorkar MDA II, ula ong ba kam sngew don jingmut ban kynthoh eiei, namar man la ka sngi ka dei ka sngi ba ‘Khuid’ bad ba kyntang bad kam mut ba ki briew ki kylla long ‘khuid’ bad ‘ngeit blei’ tang ha kawei ka sngi jong ka taiew lane tang ha ka Sngi U Blei.
‘Man ka khyllipmat kaba kordor, ym dei tang shi sngi’, pynphai nia u bah Paul ia ka STIEH
