SHILLONG: Ka World Bank kan pynkhuid ia ka Iewduh bad ki shnong kiba hap hapoh ka Hima Mylliem lyngba ka projek kaban iatreilang bad ka Khasi Hills Autonomous District Council (KHADC).
Ha ka 11 tarik Risaw 2023, ki briew na ka World Bank kila wan jngoh ia ka ophis ka Hima Mylliem ha Mawkhar ryngkat u CEM ka KHADC u bah Pyniaid Sing Syiem nalor kiwei, ha kaba kila iakren kumno ban wanrah biang ia ka jingkhuid bad ban pynkylla spah ia ka jaboh kaba mih man ka sngi kumba 4-5 trok.
Ia u CEM bad iaki heh ka World Bank la pdiang burom hi da u Syiem ka Hima Mylliem, u Paiem Ainam Manik Syiem haka jingdon lang ki Myntri ki Basan bad ki nongtrei ka Hima.
Kane ka jingleit u CEM bad ka World Bank ka long eh na ka bynta ban iakren halor ka KHAD (Solid Waste Management) Act, 2020 bala mynjur da u Lat ka jylla, ban wanrah ka jingkhuid jingsuba khamtam ha Ïewduh kaba dei ka ïew kaba khmih Hima Mylliem.
Kham janmiet pat ha kane ka juh ka sngi, la wan jngoh sa u Vice Chairman ka Niti Ayoog u Suman Bery ia ka ophis ka Hima Mylliem ha kaba la synran lang hi u CEM bad la pdiang burom u Syiem bad ki myntri.
Yn pynkylla spah ka World Bank ia ki jaboh na Iewduh
