SHILLONG: Ka FKJGP Riwar Mihngi kala pynkynmaw biang ia ka NHIDCL ban sdang noh ia ka kam maramot ia ka surok jot ha ka thain Pynursla jong ka NH-40.
Ka seng ka la pynkynmaw ba ha ka jingialang kaba long ha ka 26 tarik Naitung 2023, ha ka jingkhot ka SDO (C) Pynursla, ki nongmihkhmat na ka NHIDCL kila kular ban sdang noh ia ka jingmaramot ia ka surok kaba la sniew palat tang shu kham rang ka bneng. Mynta ka la iaid sha ka lai bnai eiei hynrei khlem pat leh eiei bad ka surok ka la nang jot nang pra haduh ba ka la buh jingeh ia ki paidbah ha ka leit ka wan.
Ka seng ka la ai jingthoh ha u Executive Director (P) ka NHIDCL Shillong ba ka kompeni ka dei ban bat ia ka jingkular ha ka jingialang ba la dep, bad ka la phah lang ruh ia ka jingthoh jong ka jingialang kaba la ioh kopi na ka SDO Pynursla.
U President u bah Evanfield Khonglam bad u Secretary bah Eleazer Diengdoh kila ong ba dei ban siang noh da ka rong ha ki jaka ba shu lape da ki maw bad khyndew ia katei ka surok khnang pynsuk ia ka leit ka wan.
Lah ban kdew ba ka KSU South Central circle ka la pynlong ia ka jingiakhih ha ka 1 tarik Nailar 2023 ban pyrshah jur ia ka jingsniew ka surokbah NH-40 khnang ba ka kompeni NHIDCL bad ka sorkar jylla kin shim khia ban maramot noh mardor ia katei ka surok.
Phah siang rong noh ka FKJGP Riwar Mihngi
