SHILLONG: Ka dorbar kyrpang ka Mynta ka sngi u Chief Executive Member jong ka Khasi Hills Autonomous District Council u bah Pyniaid Sing Syiem u la wanrah ha ka jingpan pisa shuh sa T.4.35 klur ha ka dorbar ka Council mynta ka sngi.
Ia kane ka mang tyngka la pdiang ka dorbar ka Council na bynta ban pyndap ia ki jingdonkam ba kongsan jong ka Council.
U CEM jong ka KHADC u la ong ba ka jingpan shuh ia katei ka pisa ka long ban pyndon kam ha kane ka snem mang tyngka 2023-2024 ha ki tnad bapher bapher.
Ia kane ka pisa yn iasam bad ki para MDC ba kin pyntrei kam bad lyngba kane ka pisa yn shna ruh ia ka madan ialehkai ha New Shillong Township ka ban dei jong ka KHADC.
Na ka bynta ka Art bad Culture la mang pisa T.20 lak tyngka ban ai ka jingkyrshan kum ka Shad Weiking, Nongkrem bad kiwei ki jingshad ha ki Hima kiba pynneh pynsah ia ka riti dustruct, ia kane ki MDC ki lah ban phah ia ka jingturwa sha ka EC.
Na ka bynta ban siew ia ka bai bam tymmen jong ki MDC, la mang T.20 lak tyngka namar kumba ka long mynta ki don 30 ngut ei ei ki MDC kiba dei ban ioh ia ka baibam tynmen jong ki bad kane ka pisa kan long tang haduh ban Lber 2024, la dep ban siew iaki MDC ka bai bam T.24 lak tyngka.
Ka pisa T.3.5 klur kane ka long ban siew ia ka arrear jong ki nongtrei ka ophis, ka pension jong ki nongtrei na ka liang jong ka EC ka kwah ban siew ia kaei kaba dei ban siew sha ki nongtrei ka KHADC.
La iathuh ruh hapoh ka iing iing dorbar ba ka KHADC kan dang ioh na ka sorkar ia ka bhah na ki marpoh khyndew kiba rit ka long T.7 Klur tyngka bad na ki kali bad ki marpoh khyndew kiba heh ka KHADC kan dang ioh ia ka bhah na ka sorkar T.25 klur tyngka.
Na ka bynta ka jingshngain jong ka MDC Hostel, ym sa buh biang sa lai ngut ki nongtrei bad ka jingmang pisa T.28 lak ka long ban siew pyndep ia ki bill ba dang sah jong ki kontraktor bad T. na ka bynta ka tnad pule ban leh ia ka jingwat bniah ia ki riti dustur u khasi ka KHADC kala mang pisa T.50 lak tyngka.
Na ka liang pyrshah kila wanrah ia ka cut motion, ia kaba la soi lang da ki lai ngut ki MDC, u bah Martle N Mukhim, u bah Jambor War bad u nongialam ka liang pyrshah u bah Titostarwell Chyne, hynrei hadien ba la pynshai da u CEM u bah Martle N Mukhin ba wanrah ia ka cut motion la weng noh.
Mynjur ka dorbar ka KHADC ia ka jingpan pisa shuh sa T. 4.35 klur
