SHILLONG: Ka Khasi Hills Autonomous District Council (KHADC) kan pynkylla biang ia ka ka Administration of Elaka Act 1991, da kaba pynkylla bad bsuh ia ki kyndon thymmai, khnang ban ai bor ia ki shnong ban thaw ia ka Committee ban peitngor ia ki kam sniew.
Ia ka Administration of Elaka (Amendment) Bill 2023, yn wanrah ha ka dorbar kaban long ha ka 22 bad 25 tarik mynta u bnai.
U Deputy Chief Executive Member u bah Pynshngain N Syiem u la ong ba ha kane ka jingpynkylla, kan don ka Social Vigilant Committee ha man ki shnong ban don u chairman bad ki dkhot ki long ki longkmie, ki samla bad na ka dorbar shnong. Katkum ka jingong u bah Pynshngain ka kamram ba kongsan jong kane ka Committee ka long ban peitngor bad tehlakam ia ka jingwan rung bad ka jingsah miet ki briew nabar ha kaba kan don ka rekod, bad khang ruh ia ki kam sniew ha ki shnong ki thaw ryngkat ka jingiatreilang bad ki pulit.
“Yn peit bha ia ka jingtreikam ki shnong ki thaw ban khang lad ia ki kam sniew bad ka jingrung ki briew nabar khlem ki kot ki sla bad la rai ban wanrah ia ka jingpynkylla ia ka Administration of Elaka (Amendment) Bill 2023, bad ha kane ka jingpynkylla yn bsuh ia ki seng longkmie, seng samla shnong, ha kaba kan don ka Social Vigilant Committee. Ka dorbar dong, dorbar shnong bad ban buh ia ki rekod ka shnong ia ki briew kiba wan rung wan sah, khnang ban lait na ki kam sniew bad ban sted ban thwet haba don kino kino kiba leh kam sniew”, la ong u bah Pynshngain.
Kane ka ain kan iarap shibun ha kaba yn ai syrnod ia ki briew kan shong katkum ki jait kam bad kane ka long ban pyrkhing bad peitngor ia ki briew kiba wan nabar bad kumjuh ia ki kam sniew bad lada don kano kano kin iatreilang bad ki pulit.
Ha kane ka ain, kan don ka Committee ban khlieh da u chairman ha kaba yn long dkhot lang ki seng kmie, seng samla ryngkat ka shnong, ban peit ia ki kam sniew ha shnong ha thaw.