SHILLONG: Ka KSU EJHDU ka la shim ia ka sien jam kaba ar ban pynlong ka jingiakhih paidbah da kaba thiah hapdeng surokbah NH-6 ha Khliehriat kaba dei ka Headquarter jong ka District East Jaiñtia Hills.
Ia kane ka jingiakhih yn pynlong ha ka 25/09/2023 naduh ka por 10:00am haduh 04:00pm. La shim ia kane ka rai hadien ba ka NHAI kam shym la patiaw ne sngap ia ka jingdawa ka seng ha ka wat ba nyngkong jong ka jingiakhih ha khmat Tollgate ha Lumshnong mynha ka 08/08/2023. Ka jingiakhih ha kato ka sngi kaba la wan ia shim bynta naduh ki rangbah shnong jong ka thaiñ Elaka Narpuh lem bad ki paidbah ba bun. U Manager Technical jong ka NHAI u Biswa Jyoti Lahkar u la kular ban pyndep ia ka jingmarmot ia u surok hapoh ka 6 taïew kaba mut un sdang naduh ka 09/08/2023, hynrei kata ka 6 taïew ka la jan kut, hynrei ym don dak eiei. Dang ha kine ki khyndiat sngi ka seng ka la hiar shaduh Ratachera ban jurip, la lap pynban ba u surok u nangjot nangjot rathai katba nangmih ki sngi. Kane ka long ka jingkular kai kular thok jong ka NHAI. Dei halor ka jingleh bymsuid ñiew ka NHAI kumjuh ka sorkar ka la pynlong ruh tang ka jaka iaid na surok ym don jaka shuh ia ki paidbah. Ym don ba nud shuh ban mih iaid kai sha surok. Por don slap da ka ktieh por rang rkhiang da u pum pum. Sangsot shisha ia u paidbah, kat sha ba leit ka jingsahkut kali, ki paidbah shisha ki la mad kthang.
Ka seng ka khot ka wer ia ki paidbah nongshong shnong ka East Jaiñtia Hills District baroh kawei bad ia kiwei kiwei ki paralok sengbhalang, ban wan ban ia snoh kti lang ha katei ka jingiakhih ba jai jai da kaba ngin thiah hapdeng surok bah. Ka long shisha ka jinglehraiñ kaba khraw ia ka sorkar jylla ha khmat ki 4 tylli ki jylla ka thaiñ shatei lam mihngi kum ka Mizoram, Tripura, Manipur bad Assam, namar une u surok bah u dei uba pyniasoh bad kitei ki jylla.
Ka KSU EJHDU lyngba kane kyrwoh ka la kyntu ia baroh ar ngut ki MLA jong ka District East Jaiñtia Hills ban kren ia ka mat halor u surok NH-6 ha ka dorbar synrai jong baroh ki MLA kaba dangiaid mynta hapoh Assembly.
Ki nongmih khmat jong ka District kim dei ban sngap jar haba kat kane ka jingeh ki paidbah ki ia kynduh. Ka seng ka kyntu ia phi ki nongmihkhmat baroh jong ka iing dorbar thawain ka jylla bad khamtam ia arngut ki nongmihkhmat ka thain ba donburom naduh ka bah Kyrmen Shylla MLA 6 Khliehriat LA Constituency bad ka Kong Santa Marry Shylla MLA 5 Sutnga Saipung LA Constituency.
Ki MLA kin hap ban kylli jingkylli na ka sorkar lyngba u myntri ba dei peit Bah Prestone Tynsong, myntri ka tnad PWD, balei ka NHAI ka ioh leh mon haduh katne bad ban rah ia kane ka mat mar mar ha iing dorbar thawain ka jylla khnang ba u paidbah hi jong ka thain un tip iaka jingshisha. Kane ka long ka kyrwoh khubor na u Samla Hamewanpynhun Ryngkhlem, Publicity Secretary KSU East Jaintia hills district Unit.
Yn thiah paidbah hapdeng surok ba sniew tasam ka surokbah NH-6 ha East Jaintia
