SHILLONG (PIB): U Vice- President jong ka India, u Jagdeep Dhankhar un sam ia ki khusnam Sangeet Natak Akademi Amrit Awards ha ka jingialang jong ka Azadi Ka Amrit Mahotsav sha 84 ngut ki barikor ha kaba iadei bad ka of performing arts of India kiba la don 75 snem ka rta ki bym pat ioh kano kano ka jingshah pynkup burom jong ka ri ha ka jingim jong ki haduh mynta.
Uwei na ki nongtem uban ioh pdiang ia ka khusnam, u dei u bah u Bah Gloucester Nongbet na Meghalaya.
La kha ia u Bah Gloucester Nongbet ha ka 8 tarik u Naitung 1938 ha nongbah Shillong kaba don ha ka East Khasi Hills district jong ka jylla Meghalaya. U la iohsngew ia ki sur jingrwai tynrai jong ka jylla naduh ki por ba u dang khynnah. U dei u ophisar IRS ba la shongthait na ka tnat Customs, Sorkar Meghalaya.
U Bah Gloucester Nongbet u dei uba la paw bha ha ki sur jingrwai tynrai, ka jingthaw jingrwai bad ka put ka tem, khamtam ha ka Duitara – kaba dei ka jingtem tynrai jong ki Khasi. U la pyntbit ruh ha ka jingshna Duitara bad u nang ruh ban tem ia ka King, Bisli, Guitar bad ka Piano. U Bah Gloucester Nongbet u la thoh palat shi spah tylli ki jingrwai tynrai shaphang ka mariang, ka jingieid ri bad ka jingngeit.
U dei u barikor ba don ha ka kyrdan ‘A’ jong ka All India Radio bad Doordarshan. U la pyni ia la ka sap ha ka put ka tem ha ki prokram ba bun bha ha Meghalaya bad ha kiwei kiwei ki bynta jong ka ri. U la thoh shibun ki script na ka bynta ki phlim bad u la iashim bynta ruh ha ka phlim Khasi kaba tip kum ka Sha Ba Sep Ka Sngi bad kiwei kiwei. U Bah Gloucester Nongbet u la ioh ia ka khusnam Sangeet Natak Akademi Amrit Award na ka bynta ka jingnoh synniang jong u sha ka put ka tem tynrai jong ka Jylla Meghalaya.
Ha ka jingai jingkren ha ka jingialang bad ki lad pathai khubor mynta ka sngi ka Chairman jong ka Sangeet Natak Akademika ka Dr. Sandhya Purecha ka la ong ba ka khusnam Sangeet Natak Akademi Amrit Awards kadei ka jingpynkup burom jong ka ri sha ki barikor kumjuh ruh ki nonghikai bad ki riewshemphang ha ka liang ka performing arts. La jied ia ki nongioh khusnam da ka General Council jong ka Akademi, ba kynthup ki nongrwai ba tbit, ki nongshad, ki nongak theatre bad ki riewshemphang ha kine ki bynta bad kito ba la ai jingmut da ka Sorkar India, ki Sorkar Jylla, bad ki Union Territory. Ka la pyntip shuh shuh ba kane ka khusnam ka kynthup ia ka song tyngka kaba T. 1,00,000 (shi lak tyngka) nalor ka Tamrapatra bad Angavastram.
Ia ka khusnam Sangeet Natak Akademi Amrit Awards yn sam da u Vice President jong ka India ha ka jingialang kaba kyrpang lashai ka sngi kata ha ka 16 tarik u Nailur, 2023 ha Vigyan Bhawan, New Delhi ha ka jingiadonlang u Myntri ba dei khmih ia ka Law and Justice bad u Myntri Khynnah ba dei khmih ia ka Tnat Culture and Parliamentary Affairs, u Arjun Ram Meghwal bad ka Myntri Khynnah ba dei khmih ia ka Tnat Culture and External Affairs ka Meenakashi Lekhi.
Hadien ka jingialang sam khusnam kan don ruh ka festival of performing arts ba kynthup ia ki nongjop jong ka Sangeet Natak Akademi Amrit Awards naduh ka 16 haduh 20 tarik Nailur 2023 ha ka por 6 baje janmiet man ka sngi ha Meghdoot Complex, Sangeet Natak Akademi, 35, Feroze Shah Road, New Delhi.
Ka Joint Secretary ha ka Tnat Deirit ka Uma Nanduri, Vice Chairman, Sangeet Natak Akademi u Joravarsinh Jadav bad Secretary u Raju Das ki la iadonlang ha kane ka jingialang bad ki lad pathai khubor.
Yn pdiang khusnam Sangeet Natak Akademi Amrit Awards u bah Gloucester Nongbet
