SHILLONG: Ka Hynniewtrep Youth Council (HYC) Sohiong circle ka la ujor ha u Chief Executive Member ka Khasi Hills Autonomous District Council (KHADC) u bah Pyniaid Sing Syiem halor ka jingtang Jait ia ar tylli ki longïing kajuh ka jait.
Haba kren sha ki lad pathai khubor ha ka sngi Balang, u President ka HYC Sohiong u bah Purningstar Shabong u la ong ba ki don ar tylli ki longïing kiba tang jait kajuh ka jait. “Katkum ka sain pyrkhat kum ka jaitbynriew, ha kawei ka longkur ha kawei ka longjait don kawei ka iawbei, te, hynrei lada tang jait ar tylli kajuh ka longïing, kata kan wanrah ia ka jingbym iahap bad la kyntu ia u CEM ban pynbeit ia kane ban lait na kano kano ka jingeh hadien habud’, la ong u bah Purningstar.
Kawei pat ka bynta, ka long ka jingioh jait ki kynthei dkhar kiba shongkha ia ki shynrang Khasi. “Ki bun ki kynthei dkhar kiba shong lok ia u shynrang Khasi kila ioh lypa ia ka jait Khasi bad lyngba jongki, kan pynlong ia kiba haïing jongki ban ioh ia ka jait Khasi lyngba ki rangbah kur ne rangbah shnong ba shu kam kiba lah ban ai syrnod ban pynshisha ba kin ioh pat ia ka Schedule Tribe bad kane ka buh jingma kaba khraw ia ka jaitbynriew”, la ong u bah Purningstar.
U la ong ba kane ka long kum ka lynti iaid kaba suk ba kin ioh jait Khasi da kane ka rukom.
U President ka HYC u la ong ruh ba ka jingtang jait u dkhar ha kaba ka seng ka la lap mynshwa ba uwei u dkhar uba kyrteng u Naresh Ashish uba la tang jait ia kawei ka dkhar bad mynta ruh la lap ba uwei u dkhar uba kyrteng u AL Joseph, bad na ka liang ka seng, kam iahap ba u dkhar un leh ia ka tang jait namar ba lada ai lad ia uwei, kiwei ruh kin sa leh.
Ka seng ka la ai jingmut ruh ha u CEM halor ka jingshim kabu ki rangbah kur ban pynshisha ia ki dkhar ruh namar ba ia ki dkhar ruh ki ai syrnod kur. “Ban ioh ia ka NOC ban ioh ia ka jingtang jait, dei ban soi da baroh ki dkhot ka Executive member ym ban ailed marwei ha u rangbah kur”, la ong u bah Purning bad bynrap, ‘ka Council ka dei ban leh eiei ban pynbeit ia kane lyngba ka Khasi Hills Autonomous District (Khasi Social Custom of Lineage) Act, 1997 ban khang lad ia ki bym dei Khasi”.
U la iakren ruh halor ka Clan Bill ban pynwan dur bha khnang ba kan ioh noh ia ka jingmynjur na u Lat ka jylla.