Shillong: U President ka Hynniewtrep Youth Council u bah Robertjune Kharjahrin u la ong ba ban pynkylla ia ka ri India kum ka Secular sha ka ri Hindu, kumba la thmu ka BJP kam long kaba suk namar ba ka donkam 2 na ka 3 bynta ka jingkyrshan ki MP ha Parliament.
Ka donkam ruh ban ioh ia ka jingkyrshan 50 percent na ki jylla ha ka ri bad kawei pat ka long ba ka Supreme Court kan tuklar shisien ba ktah ia ka riti synshar ka ri.
Ha ka jingshisha, ka ktien India ka wan ha khmat duh bad la pyndonkam lang ruh ia ktien Bharat ha kiba bun ki rukom. “Kine ki kyntien ki mih na Sanskrit, ka India ka kham lait na ka jingkhleh milai jaktung katba ka ktien Bharat ka iasnoh ia ka Hindu”, la ong u bah Robertjune.
U la ong ba ka ktien India ka kham long kaba pdiang da baroh kyllum ha kylleng kynthup Shabar ka ri bad ka ktien Bharat ka long ban pynkulmar ia ki paidbah namar ba katkum ka riti synshar ka ri, ka shah ban pyndonkam ia kine ki ar tylli ki kyntien hynrei kiba bun ki paidbah ki jied ban pyndonkam da ka ktien India kaba kham long secular ne ka bym iashah niam.
“Kane ka dei ka buit ka BJP ban pynklet ia ki kam bamsap, ia ki kam kiba ktah ha ka ioh ka kot, khnang ba ki paidbah kin shongshit ban jied ia ka BJP”, la ong u bah Robertjune.
Haba kren mynta ka sngi, u la ong ba kumba ka long mynta, kan dang shem jingeh bha ba kan lah ban leh ia kane watla ym pat lah ban tip hadien.
U bah Robertjune u la ong ba ki paidbah kim dei ban sngewthuh bakla namar ba la don ki seng sain pyrthei kiba pynbna paidbah ban pynkylla ia ka riti synshar ha ka ri. Lada ki lah ban weng ia ka India sha ka Bharat, kin sa pynkylla syndon sha ka ri Hindustan syndon.