SHILLONG: U Symbud Myntri Rangbah ka Jylla uba khmih ia ka tnat Home (Police), u Bah Prestone Tynsong u la ong ba ha ka jingiakren iasuk ban sa shong biang bad ka seng Hynniewtrep National Liberation Council (HNLC), ka Sorkar ka kwah ban ïakren bad ki bor ba halor jong ka seng, la ka long ba u Chairman lane u General Secretary.
Lah ban kdew ba ka seng HNLC ka la pynpaw ka jingpyrshah kaba jur ia ka jingpynmih hukum jong ka sorkar jylla dang shen ban khot hajir ia u bah Saiñkupar Nongtraw, uba dei u General Secretary bad u Pyblicity Secretary ka HNLC, ba un leit mih da lade ha kashari bad kane ka jingkhot hajir ka dei ruh haba ka seng ka dang don hapdeng ka jingiakren iasuk bad ka Sorkar.
Haba kren hynne ka Lah Sngi U Blei, u Bah Prestone u la ong ba naduh ka jingiakynduh kaba nyngkong la dep ban pynshai ba ka Sorkar ka kwah ban iakren bad ki bor ba kham halor ka HNLC, ym tang bad u Vice Chairman, bad bynrap ba lada ka HNLC ka shim khia ban iaid shakhmat bad ka jingiakren iasuk, sngewbha ban phah ktien lane ai ia ka rai lyngba u ksiang uba ki la buh. U la ong ba ka Sorkar ka shim khia ia kane ka kam bad ka kloi ban iakren ha kano kano ka por.
Na ka liang u Bah Prestone u la phah ka khubor sha ki nongialam ba hakhmat ka seng HNLC ban wan shakhmat namar baroh ar ki Sorkar ki ap ban lah pyniaid shakhmat ia ka jingiakren iasuk.
Haba kylli, u Symbud Myntri Rangbah u la ong ba na ka bynta ka jingiakren kaba bud, ka Sorkar ka aps a tang ia ki nongialam ka HNLC ban phah ktien bad ka shong ha ka HNLC ban jubab lano ban don biang ka jingiakren, bad na ka liang u bah Prestone u la kren shai ruh ba la kumno kumno u Chairman lane u General Secretary ka HNLC u dei ban don lang ha ka jingiakren kaba ar sien.
Ka sorkar ka kwah ban iakren bad u chairman ne General secretary ka HNLC, ong bah Prestone
