SHILLONG: Ym dei shuh ba kawei ka kynhun kan tei pop ia kawei pat ka kynhun, hynrei dei ban shim beit tang kawei ka rai ban pyntreikam ia ka National Education Policy (NEP). Kane ka sur ka la mih na uwei u rangbah uba dei ruh u kum u kpa jong ki khun samla ba pule.
Haba kren sha ki lad pathai khubor mynta ka 29 tarik Nailar 2023, u bah Jinu Kharlukhi uba dei u rangbah shnong jong ka shnong Mawlyndep, u la wan mih shkhmat kum uwei na u kpa ban pynpaw ia ka jingai jingkyrshan ka jong u ha kaba iadei bad ka NEP 2020.
U la ong ba ka jylla hi ka donkam da ki IAS Khasi bad ym donkam shuh ban wanrah kiba nabar bad kaba wanrah ia ka NEP kin bun ki samla kiban kiew ha ka jingpule bad, u la kyntu ia ka sorkar ba ka dei ban pynmih ia ka hukum ban pyntreikam noh ia ka NEP khnang ba ki khynnah kin ioh ka jingmyntoi ha ka liang ka jingpule.
Ha kaba iadei bad ka jingiakren hapdeng ka MTCA bad u Vice Chancellor ka NEHU, u la ong ba kam dei shuh ka por ba kawei ka kynhun kan tei pop ia kawei pat ka kynhun, hynrei dei ban shim beit tang kawei ka rai ban pyntreikam ia ka NEP.