SHILLONG: Ha kine ki khyndiat sngi, ngi iohi ba don ar jait ki Pulit ha kane ka Jylla ka Jong Ngi. Ka kynhun Pulit kaba Nyngkong kadei jong kito ki Pulit kiba bom kpud ia ki paidbah, ki Pulit shynrang kiba ktah kti bad bom dusmon ia ki longkmie, ki Pulit kiba don 50-60 ngut kiba ieng rasong ha ryngkat ki tiar ialeh kum ki tear gas bad ki suloi ban iada ia ki Karkhana jong ki Dkhar bad kumjuh ruh ka kynhun Pulit kaba shah hukum ha ki heh dkhar jong ka Topcem ban bom kput ia ki khun Hynniewtrep. Sa kawei pat ka Kynhun Pulit kadei kaba don ha Khappud (Block 1 Area) Khanduli sector. Kine ki Pulit ha Khappud kiba don kumba 10-15 Ngut ki ba hap ban mareh na ki jaka ap pahara ban iada ia la ka jingim namar ba ki tieng palat ioh shah lun maw bad shah siat da ki jri ha kita ki Karbi.
Ki Jingkylli kiba ngi kwah ban kylli na u Ministar ki Kam Pohing ka Jylla, ka long Hato hakhmat ka Sorkar Jylla ka dang kham kor ki Karkhana pynjot mariang ne kham kor u pud u sam bad ki Khun Hynniewtrep ba shong basah ha Khappud? Balei la buh Pulit tang 10-15 ngut ha Khanduli sector hynrei da ki 50-60 ngut pat ban iada ia ki Karkhana pynjot mariang? Balei la ai hukum ia ki Pulit iada Karkhana pynjot mariang ban pyndonkam teargas, ban bom kput ia ki paidbah, ban phah ktah kti ha ki pulit shynrang ia ki longkmie katba ym shym lah ai hukum pat ia ki Pulit ha Khappud ban pyndonkam ia ki suloi ba ki bat ha ki kti ban iada ia u pud u sam ne ban siat tear gas ia kita ki Karbi kiba wan ruh shapoh u pud u sam ka Jylla ha Lapangap?
Ka Sorkar bad ka Tnat Pulit kidei ban jubab halor kine ki jingjia. Hato kine ki Pulit ki phet hi ba ki tiengiap bad ba duna briew ne namar ba kim ioh hukum na kiba halor ban bom bad siat ia ki Karbi kiba thmu pyniap ia ki Pulit bad ki paidbah ha Khappud?. Balei ngi ong ba ki Karbi ki thmu pyniap ia ki Pulit bad ki khun Hynniewtrep ha Lapangap kadei namar katkum ki Pulit Meghalaya, lada phi lun maw ne siat da ka jri kata ka lahdei ka kam thmu pyniap briew bad ia kata ngi lap lyngba ka jingjia ba dang shen ha Tura ba shah lun maw ka Mini Secretariat, ki Pulit ki lah thep kyndon thmu pyniap briew ia ki paidbah kiba don ha kato ka sngi. Lada ka Sorkar kam lah ban ai Hukum ia ki Pulit ha Khappud, te balei pat la ai hukum ban siat teargas ia ki Nonghikai, balei la ai hukum ban bom kput da ki lathi ia ki Longkmie ha Lumshnong bad balei la ai hukum ban siat iap ia u (L) Cheristerfield Thangkhiew?.
Ngi dawa ba ka Sorkar ka dei ban phah da ki spah ngut ki Pulit ha man ki BOPs bad OPs ha ki Khappud ha ryngkat ki tiar ialeh kiba biang bad nalor kata ka dei ban ai hukum noh mardor ia ki pulit ba kidei ban pyndonkam ia ki teargas, ban lathi charge bad siat ruh lada donkam ban iada ia u pud u sam bad ia ki paidbah ha Khappud.
Lada ka Sorkar kam nud ban phah pulit da ki spah ha ki BOPs bad OPs ha ki Khappud ha ryngkat ki tiar ialeh bad ka Hukum kaba shai, na ka liang ka Seng ngi dawa ba ka lah bha ia ka Sorkar ba kan shu ai noh da ki tiar ialeh kum ki Suloi, ki kuli bad kiwei kiwei ki tiar ia ki riewpaidbah ha Khappud ba kin iada hi noh ia la ka khyndew ka shyiap bad ia la ka jingim namar kumba ka long mynta ym I shaniah ia ki Pulit ka Meghalaya. Kane ka dei ka kyrwoh na bah Roy Kupar Synrem, General Secretary HYC.
Don ar jait ki pulit Meghalaya-kiba bom kpud ia ki Khasi bad, kiba phet krad ba tieng ia ki jri siat sim: HYC
