SHILLONG: Ka Jan Arogya Samiti (JAS) jong ka HWC-Sub-Centre Laitnongkseh ha ka 22/8/2023 ka la pynlong ïa ka jingpynsngewthuh paidbah halor ka phang ka jingktah na ka jingarmet khynnah (Teenage pregnancy), ka aiñ POCSO (POCSO Act), halor ka jingpang HIV bad Aid bad kumjuh ruh halor ka jingkyrni ha ki jingdih pynbuaid kaba la pynlong ha ka shnong Laitnongkseh ha ka sngi Nyngkong.
Ha kane ka sngi la wan ban shim bynta da ki skul ba pher ba pher jong ka thaiñ kiba kynthup ïa ka Wahnongkseh Upper Primary School, ka Laitnongkseh Upper Primary School bad ka Mawkahiar Secondary School. La wan ruh ban shim bynta da ki SHG bad ki VO jong ki shnong kiba mar jan.
Ki nongkren ba kyrpang ha kane ka sngi ki kynthup ïa i bah W. Kharpran iba dei i Block Programme Manager iba la kren halor ka jingtreikam jong ka JAS, ka VHC bad ka jing don bynta kine ha ka imlang sahlang.
La ioh ruh ïa ka jingkren na i bah A. Shanpru iba dei i Officer i/c. jong ka Sohiong Police Output ha kaba ila pynshai halor ka aiñ kaba teh lakam ïa ki kam thombor ïa ka longrynïeng jong ki khyllung khynnah kaba tip kum ka POSCO Act. Ka jingpynsngewthuh ia ki khynnah samla, longkmie longkpa ba kim dei ban shongkha khynnah bad ba kim dei ban pynshlur ban shongkha khynnah namar kane ka long kaba beaiñ bad kaba lah ban ngat ha ki jingpynshitom ba pyrkhing jong ka aiñ. Ha ka juh ka por, i Bah A. Shanpru ila kyntu ruh ba ym dei ban thombor ïa ka longrynïeng jong ki khynnah bad kiwei kiwei ki jingpynshai kiba ïadei bad ka tei ka aiñ.
La ioh ruh ka jingpynshai na i kong P. Nongkhlaw (PHN) iba dei i nongtrei jong ka Sohiong CHC ha kaba ila pynshai halor ka jingeh jingmynsaw na ka jing shongkha khynnah bad jingarmet ha ka por ba dang rit ka rta.
Kumjuh ruh na ïoh ka jingpynshai na i Bah J. Pohtam (MACS) bad i kong G. Jyrwa kiba la pynshai halor ka jingpang HIV bad Aids bad ka jingma na ka jingdih ia ki kynja jingdih pynbuaid bad u drok.
La pynshit pynshngaiñ ïa kane ka prokram da ka jingrwai na ki khynnah skul jong ka Wahnongkseh Upper Primary School bad ka jingshad Zumba na i kong L. Majaw (MLHP) bad i paralok.
Ha kane ka sngi la don lang ruh ki dkhot jong ka Executive Dorbar jong ka Shnong Laitnongkseh kiba kynthup ïa u bah Dhotdingstar Nongbri (Secretary Shnong), Bah Purningstar Shabong (Assistant Secretary Shnong) bad kiwei kiwei.
La pynïaid ïa kane ka prokram da u Bah Diber Shabong uba dei u Chairman ka JAS uba dei ha ka juh ka por u Rangbah Shnong jong ka shnong Laitnongkseh.