SHILLONG: U Chief Executive Member ka Khasi Hills Autonomous District Council, u Bah Pynïaid Sing Syiem u la ong ba ki don haduh kumba 3500 tylli ki kur ki jait Khasi, bad pynpaw ruh ba haduh mynta kam pat don satia ka aiñ ban nang pynkhlaiñ shuh shuh ia ka jingtreikam hapoh ka long kur long jait.
U la ong ba na liang ka KHADC da ka jingiatrei lang jong baroh ki MDC ka la wanrah ruh ia ka Clan Administration Bill, 2022, hynrei kane ka Bill ka shah pynphai noh ban bishar biang ha ka tnat aiñ jong ka Jylla bad ka tnat DCA. Halor kane ka jingshah pynphai noh jong ka Clan Bill la iakren ruh bad ka Synjuk jong ki Rangbah Kur ka Bri Hynniewtrep ban pynbit pynbiang.
Ha kawei ka liang u CEM u la pyntip ba katba ym pat long aiñ ka Clan Administration Bill, 2022, ka KHADC kan pynmih ia ka jingpynbna ba ki Kur kiba la don ia ki seng Kur kin pyntip bad pynrung kyrteng noh ka Council.