SHILLONG: U Bah Erwin K Syiem Sutnga uba dei u nongiasaid aiñ u la ong, ban iada na ka jingshim jait pathar jong ki briew ki bym dei ki khun Khasi lyngba ki affidavit donkam ban pyntreikam thikna bad pura ia ka Khasi Hills Autonomous District Khasi Social Custom of Lineage Act, 1997.
U la ong ba la kylla aiñ sa ka Clan Administration Bill, kan pynkhlaiñ shuh shuh ha kaba iadei ban teh lakam ia ka jingshim jait pathar jong ki briew ki bym dei Khasi bad ha ka rukom synshar bad pyniaid ia ka kur ka jait ha baroh kawei ka bri Hynniewtrep.
Ka Synjuk jong ki Rangbah Kur ka Bri Hynniewtrep (KSRKBH) hynne ka sngi ka la iakynduh ia u Chief Executive Member ka KHADC, u Bah Pynïaid Sing Syiem ban iatai halor ka jingshah pynphai ka Clan Administration Bill ba la mynjur da ka KHADC. Ha kane ka jingiakynduh na ka liang ka synjuk ka la tyrwa ruh ia ka kyrteng jong u Bah Erwin bad u Bah RL Blah ban thung kum ki dkhot ba pura hapoh ka synjuk.
U Bah Erwin u la iathuh ba ha kane ka jingiakynduh la iakren halor ka jingpynkylla jait jong ki bym dei Khasi lyngba ki affidavit, bad na ka Synjuk ka la kyntu ruh ia u CEM ban tuklar mardor ia kane ka jingshim jait pathar da kaba pyntreikam pura ia ka Lineage Act, 1997. U la iathuh ba na liang u CEM ruh u la pynpaw ba ka long kaba donkam ban leh eiei noh halor jong kane ka jingshim kabu jong ki bym dei Khasi.