Shillong: U Bah Rojet Buhphang uba dei u nongshna kti ne craftsman ba pawnam bad u nonghikai tem tynrai ba pawkhmat ka jylla uba la jop teng ruh ia ka khusnam ‘Sangeet Natak Akademi,’.
U Bah Buhphang u dei u nongai jinghikai ba la shemphang bha ha ka liang ka tem ka put hapoh Sieng Riti Institute, Wahkhen kaba dei ruh ka jaka aijinghikai kaba pynneh pynsah ia ka put ka tem tynrai bad halor ki jingpynneh pynsah ia ka kolshor jong ka shnong Wahkhen.
Ki ba bun bah ki khynnah kumjuh kiba la san napoh kane ka shnong ki la ioh pdiang ia ki jinghikai na kane ka Institute kaba la khring ruh shibun ia ki nongwan shangkai pyrthei na kylleng.
Nalor kata une u nonghikai u dei ruh uba ju shna bad pynmih ia ki tiar tem tiar put tynrai, kata kum ka ksing, tangmuri, duitara nalor kiba bun kiwei pat. Nalor ba u khmih bad pyniaid ia katei ka Institute. U bah Rojet u dei ruh u enjiniar halor ki jingshna jingtei tynrai uba la shna ia ka jingkieng siej hapoh ka shnong Wahkhen.
Ia kane ka jingkieng siej la shna ha ka jaka riat kaba da ki maw ban sakhi ia ki jaka riat ba itynnad jong ka shnong Wahkhen.U Bah Buhphang u dei ruh u treasurer jong ka Tourism Promoters Trekking Society (TPTS) ka Wahkhen.
U la khlad noh ha ka 7 tarik Nailar 2023 ba la lah hadien ba ka jingshitom ka la bat ia u lah kham slem hapoh ka iingsah jong u ha ka shnong Wahkhen, Pynursla bad la pynkhuid ia ka met jong u ha ka 9 tarik Nailar 2023 ha shnong Wahkhen hapdeng ka jingpaid dohnud kiba paidbah ba ieid ba thoin. Ha kane ka sngi on thang, la don shwa ka jingialang kynmaw burom ia une u rangbah ha kaba la ioh ia ki jingkren na u Rangbah Komik Khongjirem uba dei u President ka Sieng Riti Institute, Wahkhen, u adviser ka Trekking Society babu Kular Khongjirem, na u rangbah kur Buhphang bah Joldi Buhphang, u khynnah skul ka Sieng Riti Institute, Wahkhen bah Shalankupar Khongwet bad kiwei.