SHILLONG: Ka Meghalaya Human Rights Commission ka la lap ba ka phatok Jowai District Jail kala khapngiah smam namar la set palat ia ka jingdon ka jaka.
Ha ka jingleit jurip kyndit mynta ka sngi, hapoh ka jingialam u Chairperson ka Meghalaya Human Rights Commission Justice T. Vaiphe ba la synran lang ki dkhot ba kynthup ka kong B. Giri bad u PJ.P. Hanaman, nalor Secretary u bah FM Dopth, kila lap ba ka District Prison and Correctional Home, Jowai kala khapngiah smam shaba palat namar ba ka jaka set kaba la buh tang 120 ngut, la pynset haduh 298 ngut ki koidi.
Halor kane, ka Commission kala bthah ia u Deputy Superintendent ka District Prison and Correctional Home, Jowai ban pynkylla noh ia ka hall jong ka Vocational Training sha ka kamra ban pynsah ia ki koidi ban pyllait na ka jingkhapngiah. Ia ka jingai jinghikai Vocational Training dei ban rah noh sha ka Video Conferencing room kaba dang kylluid.
Ka Commission ka la thrang ruh ba ka sorkar ka dei ban tei shuh ia ki jaka set ban pyllait ia ka jingkhapngiah.
Ka la lap ba ka don tang kawei ka painkhana na bynta 50 ngut ki koidi bad kala donkam kyrkieh ban shna shuh ia ka painkhana na bynta baroh ki ward.
Ka la bthah ia u Deputy Superintendent ka phatok ban phah ia ka kaiphod halor ki mukotduma kiba dang sahteng jong ki koidi khnang ba kan lah ban shim ia ki lad ki lynti bad ka Legal Services Authority ban pynsted ia ki mukotduma kaban long shi bynta ban pyllait ia ka jingkhapngiah ka phatok.
Ka Commission ka la pynpaw ia ka jingbym sngew tynnad ia ka jingbym poi u Medical Officer ha kane ka jingwan jurip jongka namar ki don ki koidi ba donkam jingsumar kyrkieh.
Lap ka MHRC ba khapngiah smam ka phatok Jowai
