NEW DELHI:U Myntri Rangbah Duh, u Narendra Modi u la pynbna dang shen ia ka ‘Meri Maati Mera Desh’ campaign ha ka Mann Ki Baat. Kane ka campaign ka thmu ban pynkup burom ia ki nongiakhih na ka bynta ka jingioh jinglaitluid ka ri bad ki riewshlur kiba la aiti ia la ka jingim na ka bynta ka ri. Kane ka campaign kan kynthup ia ki prokram bapher bapher ha kylleng ka ri ban kynmaw ia ki reiwshlur (Ki Veer). Yn buh ia ki Shilaphalakam (jingbuh jingkynmaw) ban pynkup burom ia ki ha ki gram panchayat, ha jan ki Amrit Sarovar. Ia kane la pynbna ha ka jingiakynduh bad ki nongthoh khubor kaba la pynlong da u Secretary, Information and Broadcasting bad ka tnat Telecommunication, u Apurva Chandra; Secretary, Culture u Govind Mohan bad Secretary, Youth Affairs, ka Meeta Rajivlochan ha New Delhi mynta ka sngi.
Ha kane ka jingiakynduh bad ki lad pathai khubor, u Apurva Chandra u la ong ba ka Meri Maati Mera Desh kan dei ka prokram ba pynkut ia ka Azadi ka Amrit Mahotsav kaba rakhe ia ka jingdap 75 snem ka jingioh jinglaitluid ka India. Ka campaign Har Ghar Tiranga kaba la long ha kylleng ka ri ha une u snem uba la dep ka dei kaba jop bad mynta u snem kan don ka prokram kaba kham heh, ka ‘Meri Maati Mera Desh’ kan long hapoh ka Azadi ka Amrit Mahotsav, u la ong. U Apurva Chandra u la batai ba ka jingbuh ia ki Shilaphalakam kum ka jingpynkup burom ia ki riewshlur, ki Mitti ka Naman bad Veeron ka Vandan ki dei ki bynta ba kongsan jong ka campaign Meri Maati Mera Desh. Yn pynlong ruh ia ka Har Ghar Tiranga mynta u snem kum ka bynta kaba kongsan jong ka Meri Maati Mera Desh, u la ong. U Secretary u la kren ruh shaphang ka bynta jong ki lad pathai khubor ban ai jingtip shaphang kane ka campaign bad ban rah ia kane sha baroh ki bynta jong ka ri.
U Secretary, Culture, u Govind Mohan u la pyntip ba kane ka prokram kan don ki bynta kum ka jingbuh ia ki Shilaphalakam ba la aiti sha ki nongiakhih na ka bynta ka jingioh jinglaitluid bad ki kynhun pahara ha ryngkat ki sienjam kum ka Panch Pran Pledge, Vasudha Vandan, Veeron ka Vandan kaba ai burom ia ka jingaiti jong kine ki riewshlur jong ka ri. Ki Shilaphalakam lane ki jingbuh jingkynmaw kiba iaroh ia ka jingaiti jong kine ki riewshlur na ki jaka nongkyndong, panchayat, block, nongbah, municipality bad kiwei kiwei ki dei ki ban buh ha ki jaka nongkyndong bad ki jaka sor. Kin don ia ka khubor jong u Myntri Rangbah Duh ha ryngkat ki kyrteng jong kito ki briew na ka thain kiba la aiti ia la ka jingim na ka bynta ka ri.
U Govind Mohan u la ong ba kane ka campaign kadei ka jingialang pynkut ia ka ‘Azadi ka Amrit Mahotsav,’ kaba la sdang ha ka 12 tarik Lber, 2021 bad la sakhi ia ka jingiashim bynta paidbah (Jan Bhagidari) da kaba pynlong palat 2 lak ki prokram ha kylleng ka ri India. Naduh ka 9 – 30 tarik Nailar, 2023 ha ka campaign ‘Meri Maati Mera Desh’ yn kynthup ia ki prokram ban pynlong ha ki shnong bad ki block, da ki kynhun pyniaid shnong kumjuh ruh ha ki jylla bad ka ri.
U la ong shuh shuh ba yn pynlong ia ka ‘Amrit Kalash Yatra’, da kaba rah ia ka khyndew na baroh ki bynta jong ka ri ha 7500 kalash ban tei ia ka ‘Amrit Vatika’ ha Delhi. Kane ka ‘Amrit Vatika’ kan long ka dak jong ka jingkut jingmut na ka bynta ka ‘Ek Bharat Shreshtha Bharat’.
Ha ka jingbatai shuh shuh, u Culture Secretary u la ong ban pynshlur ia ka jingiashim bynta paidbah (Jan Bhagidari), la pyllait ia ka website https://merimaatimeradesh.gov.in, ha kaba ki briew kin lah ban upload ia ki selfie ba ki rah ia ka khyndew lane i sharak dew byrtha. Da kaba leh kumne, ki shim ia ka jingsmai Panch Pran, kaba phaikhmat ban pynlong ia ka India ka ri kaba la kiew, kaba pynduh ia ka rukom pyrkhat jinglong mraw, ban sngewsarong ia la ka pateng kaba riewspah, kaba bat ia ka jingiatylli, kaba pyndep ia ki kamram kum ki nongshong shnong, bad burom ia kito kiba iada ia ka ri. Shisien ba ladep shim smai, ki lah ban download ia ka digital certificate na ka website. Ha u snem ba ladep, ka prokram “Har Ghar Tiranga” ka la long kaba jop da ka jingiashim bynta lang baroh. Mynta u snem ruh, yn rakhe ia ka Har Ghar Tiranga hapdeng ka 13 -15 tarik Nailar, 2023. Ki nong India kiba don ha kano kano ka jaka ki lah ban pynher ia ka lama jong ka ri, shon selfie bad ka Tiranga bad upload ha ka website Har Ghar Tiranga (harghartiranga.com).
Ka Secretary ka Tnat Youth Affairs and Sports ka Meeta Rajivlochan ka la pyntip ba ia ki jingtip ba kham bniah shaphang ka campaign ha kylleng ka ri lah ban ioh ha ka rynsan https:// yuva.gov.in/meri_maati_mera_desh. Ha kane rynsan ym tangba kan don ki jingtip halor ki prokram bapher bapher hapoh ka campaign Meri Maati Mera Desh, hynrei ki samla ruh ki lah ban iasoh bad ka campaign lyngba kane ka rynsan da kaba upload ia ki kam kum ki selfie bad ka jingthung ia ki tynrai dieng ha kane ka website. Ka la kyntu ia ki samla ban iashim bynta shitrhem ha kane ka campaign bad ban iawer lang ia baroh na ka bynta ka sienjam jong ka ri ban pyndon burom ia ki riewshlur jong ngi bad ia ka ri jong ngi.
U Chief Executive Officer (CEO), Prasar Bharti u Gourav Dwivedi u la ai jingtip shaphang ka jinglum khubor na ka bynta ka campaign Meri Maati Mera Desh lyngba ka Akashvani, Doordarshan bad kiwei kiwei ki rynsan digital jong ka Prasar Bharti.
Ka campaign ‘Meri Maati Mera Desh’ kan sdang ha ka 9 tarik Nailar, bad kan don ki prokram haduh ka sngi ban rakhe ia ka jingioh jinglaitluid ka ri ha ka 15 tarik Nailar, 2023. Hadien kane kin don ruh ki prokram naduh ka 16 tarik Nailar, 2023 ter ter ha ki block, municipality/corporation, bad ha ki jylla. Ia ka jingialang pynkut yn pynlong ha ka 30 tarik Nailar, 2023, ha Kartavya Path, New Delhi ha ka jingiadonlang ki heh ki hain.
‘Ka Meri Maati Mere Desh’ kampein kan ai burom ia ki riewshlur ba la aiti ia ka ri
