SHILLONG: Hashuwa ka jingdap lai snem ka National Education Policy, 2020 ha ka 29 tarik u Naitung, 2023, ka Indian Institute of Management, Shillong ka la pynlong ia ka jingialang bad ki lad pathai khubor halor ka jingpyntreikam ia ka NEP 2020 ha Shillong mynta ka sngi. Ki nongmihkhmat na ka NIT Shillong bad NEHU Shillong ki la iashim bynta ha kane ka jingai jingtip sha ki lad pathai khubor ha kaba la iashim bynta lang u Director ka Regional Directorate of Skill Development and Entrepreneurship (RDSDE) lyngba ki lad digital.
Ha kane ka jingai jingtip, la pynbna ba u Myntri Rangbah Duh, u Narendra Modi un plié paidbah ia ka Akhil Bharatiya Shiksha Samagam kaba ar ka ban long bad ka jingdap 3 snem ka NEP 2020 ha ka 29 tarik u Naitung 2023 ha ITPO, Pragati Maidan, New Delhi. Kane ka prokram kaba ar sngi ka dei kaba pynlong da ka tnat Pule Puthi bad ka tnat Skill Development & Entrepreneurship. U Myntri Rangbah Duh un plié paidbah ia katto katne ki sienjam ha kane ka sngi. Ka Samagam kan pynbiang ia ka rynsan na ka bynta ki riewshemphang na ki skul ki jaka ai jinghikai ba kham halor bad ki jaka pyntbit ha ki sap ban iakren, iamir jingmut bad iasam jingmut, ki rukom treikam, ki jingjop bad ki rukom treikam ba biang tam ha ka jingpyntreikam ia ka NEP 2020.
Ha ka jingkren shaphang ka jingpyntreikam ia ka NEP 2020, u Prof Rohit Joshi Secretary sha ka Board IIM Shillong, u Prof Basav Roychoudhury bad Sanjeev Ningombam Coordinator CEDNER & Dr APJ Kalam Centre ki la batai shaphang ki seinjam ba la shim da ka IIM Shillong kiba iahap bad ka NEP.
Ki jingwadbniah bad ka Pule Puthi: Ka IIM Shillong ka ngeit skhem ha ka pule puthi kaba bun bynta kaba mut ka rukom ai jinghikai kaba pyniasoh lang ia ki jingpule bapher bapher, ka jingpyniasoh, ka jingiatreilang bad ka jingpeit ia ki rukom pyrkhat bad rukom trei bapher bapher. Kumta, kane ka jaka ai jinghikai ka thmu ban wanrah ia ka jingiar ha ki kam pule puthi ha kaba ki samla pule ki lah ban peit ia ki jingeh bapher bapher na ka rukom pyrkhat bapher bapher bad kane ka wanrah ia ki jingpynbeit kiba pura kiba wanrah ia ka jingpynkupbor ia ki samla pule ba kin iatrei lang ha ki kam bapher bapher bad don ka bynta ha ki kam pule bad ka imlang sahlang.
Ka jingpule kaba bun lad: Ki samla pule bad ki Doctoral Scholar ki ioh ia ka jingpule kaba bun lad. Ka rukom ai jinghikai ha ka IIM Shillong ka plié ia ki lad ha ki rukom ioh jingnang jingstad. Kawei na ki bynta kiba kyrpang jong ki prokram Doctoral ka dei ka jingailad ia ki briew kiba la trei ba kin shim shuti haduh shi snem ban pyndep ia kane ka prokram. Kane ka plié lad ia ki ba kin ioh ia ka jingryntih ha ka jingwad ia ka jingnang jingstad bad ki kam ba ki trei. Ha ryngkat ki jingpule kiba iahap bad ki kam, ki jingai jinghikai ki don ruh ia ki bynta bapher bapher kum ka “Management Learning from Upanishads and Indian Mythology,” “Chanakya Arthashastra,” “Management, and Liberal Arts,” “Wisdom Leadership: East-West Perspectives and Practices,” bad “Music, Aesthesis, and Communication for Excellence,” ha ryngkat kiwei kiwei.
Ka jingpeit bniah ia ka jinglah pyrkhat bad ka jingpynbeit ia ki jingeh: Ka community immersion module jong ka IIM Shillong ka mut ka jingpyrshang ha ka rukom ioh jingnang jingstad kaba mut ka jingiamir jingmut bad ki samla pule ha ki kam ka imlang sahlang. Kane ka iaid palat ki kamra ioh jinghikai kaba plié lad ia ki ba kin iakren, peit bad iashim bynta ha ka jingim, ki rukom im bad ki jingeh ha ka imlang sahlang.
Ki prokram online bad ka jingpyndonkam ia ka teknoloji: Ha kaba iahap bad ka NEP ha kane ki jaka pule ki dei ban trei na ka bynta ka jingioh jingnang jingstad jong baroh ki briew, ka prokram online executive MBA program jong ka IIM Shillong ka dei kaba la saindur kyrpang na ka bynta ki briew kiba la trei kaba plié lad ia ki ba kin kyntiew ia ka jingnang jingstad, ki sap bad ka jinglong nongialam ha ka rukom ai jinghikai lyngba ki lad online kaba bun lad.
Ka jingkyntiew ia ka jingwad bniah bad ka jingsaindur thymmai: Ki centre ba kyrpang kum ka Dr APJ Abdul Kalam Centre For Policy Research and Analysis, Centre of Development of North East Region (CeDNER) ki kyntiew ia ka jingwad bniah ha kane ka jaka pule kaba pynshlur ia ki nonghikai bad ki shah hikai ba kin iadon bynta bad ki projek wad bniah, ka jingsaindur thymmai bad ka jingseng kam lajong ha ka thain shatei lammihngi.
Ka pule puthi ia baroh: Ban pynthikna ba baroh ki ioh ia ki lad ka pule puthi kaba bha, ba kynthup ia ki samla pule na ki jaitbynriew ba dang sahdien, lyngba ka jingai jingiarap pisa kaba kot haduh T 1 klur, ka IIM Shillong ka kyrshan ia ki samla pule khnang ba yn ym don mano mano ba duh ia ka lad pule puthi namar ka jingduna pisa.
Ka jingkyntiew ia ki nonghikai: Ka NEP ka batai ia ki rukom treikam khnang ba ki nonghikai kin kham pyntbit ialade, kyntiew ia ki rukom ai jinghikai, iadon bynta ha ki kam wad bniah, iatrei lang bad kito kiba don bynta ha kijuh ki kam, bad don bynta ha ka jingkyntiew ia ka pule puthi ha ka ri. Ka IIM Shillong ka ai shibun ki lad ban kyntiew ia ki nonghikai, lyngba ki jingai jinghikai bad ka jingkyntiew ia ki sap ban kyntiew ia ki rukom ai jinghikai, ki jinglah ban iashim bynta ha ki jingwad bniah bad ka jingiahap bad ki jingtrei.
Ka jingiatrei lang bad ki jaka pule bad ki jaka trei: Ka NEP ka ithuh ia ka bynta jong ka jingiatreilang ki jaka ai jinghikai bad ki jaka trei ban wanrah ia ka jingioh jinghikai kaba pura bad ka jingpynkhreh ia ki samla na ka bynta ki kam ba kin trei. Ka IIM Shillong ka pynlong shibun ki kam ban wanrah ia ka jingiatreilang ki jaka trei bad ki jaka pule kum ka jingleit jngoh ia ki jaka trei, ka jingai jingkren na ki briew ba khot kyrpang bad ki seminar ha kaba ki riewshemphang na ki jaka trei ki iakren bad ki nonghikai, bad ki ai jingmut na ki jingshem jong ki. Shuh shuh ka jingwanrah ia ki projek kiba iadei bad ki jaka trei hapoh ki jingai jinghikai ka wanrah ia ka jingsngewthuh bad ka pyndap ia ki jaka ba suda hapdeng ki jingioh jinghikai bad ki jinglong ha ki jaka trei. Shuh shuh, ka jingpynlong ia ki jingwad bniah lang, ki jingai jingmut bad ki lad ioh jinghikai shuh shuh kiba iadei bad ki jingdonkam ha ki jaka trei ki pynkhlain shuh shuh ia ki jingiatrei lang. Ka IIM Shillong ka la sdang ia ki prokram MBA bad PhD na ka bynta ki briew kiba la trei khnag ban kyntiew ia ka jingioh jinghikai, kyntiew ia ki lad ioh kam jong ki samla pule, wanrah ia ki jingsaindur thymmai bad wanrah ia ka roi ka par ha ka jaka pule bad ki jaka trei.
La iakren ia ki san tylli ki rishot jong ka NEP 2020, ka jingioh bynta, jingryntih, jingshongdor, ka jingjemdor bad jingbahkhlieh. Ka IIM Shillong ka la iasoi ia ki jingiateh soskular bad ka Indian Institute of Entrepreneurship, Guwahati, ka Mizoram Youth Commission, ka Sorkar jong ka jylla Arunachal Pradesh, bad Manipur University kum shi bynta ka jingthmu jong ka NEP na ka bynta ka jingiatreilang bad ka jingkyntiew ia ki rukom treikam hapdeng ki jaka pule hapoh ka thain shatei lammihngi. Ka IIM Shillong ka la pynshlur ia ki samla na ka thain shatei lammihngi ban buddien ia ki jingthmu jong ki, ki kam khaii pateng, bad kiwei kiwei ki kam. Ka IIM Shillong ka iarap ban ai jingiasyllok halor ki jait kam, ka jingialam lynti ha ka jingseng kam lajong, bad ka jingpynkhreh ia ka CAT ha ki college bapher bapher. Kawei ka bynta ba kongsan ban pynurlong ia ka thong jong ka NEP kadei ka jingkyntiew ia ki jaka ai jinghikai bad ka jinglong nongialam. Ka IIM Shillong kan ialam lynti bad kyrshan ban pyntreikam ia ki rukom treikam kiba jop bad pynlong ia ki prokram ban iarap ia ki college bad ki jaka pule ban kot sha kane ka thong.
Khatduh khatwai, ka National Education Policy (NEP) ka la wanrah ka jingkylla ha ka thong na ka bynta ka pule puthi ha India, bad ia ka jingkylla lah ban sngewthuh ha ki jaka pule kum ka IIM Shillong. Lyngba ka nongrim kaba khlain ba la buh da ka NEP, ka IIM Shillong ka bteng ban nohsynniang sha ka jingkyntiew ia ka pule puthi bad ka jingkyntiew kaba pura ia ki samla pule jong ka, ka jingpynkupbor ia ki ban wanrah jingkylla ha ka imlang sahlang bad kiwei kiwei ki kam.
U S Mathivanan Regional Director RDSDE u la ai jingkren shaphang ki sienjam ba la shim da ka Regional Directorate of Skill Development and Entrepreneurship ha kaba iadei bad ka National Education Policy katba u Prof Ghanashyam Bez na NEHU u la batai shaphang ki sienjam ba la shim da ka skul bah ban pynurlong ia ki jingmyntoi jong ka NEP ha ka jylla haduh mynta. U Prof Harish Chandra Das jong ka NIT Meghalaya u la iashim bynta ha ka jingialang lyngba ka bor internet lem bad u Ajaypal Singh Somvanshi, Principal jong ka National Skill Training Institute, Tura.
Shaphang ka Akhil Bhartiya Shiksha Samagam (29 – 30 tarik Naitung)
Haba pyrkhat ia ka jingthmu jong ka India ban don ia ka ioh ka kot kaba 5 trillion ha ka samoi jong ka Amrit Kaal, hap ban pynkhlain ia baroh ki kam jong ka ioh ka kot lyngba ka jingpynbiang ia ki nongialam kiba don ka jingnang jingstad bad kiba la tbit ha ka kam. Ka NEP 2020 ka plie lad na ka bynta ka jingkyntiew bad pynkhreh ia ki samla jong ngi na ka bynta kata ka jingkitkhlieh, pynkhreh ia ki na ka bynta ki kam kiba dang mih. Ka polisi ka ban jur halor ka jingpynbiang ia ki jingtbit kiba kham biang jong man u briew kum ka jinglah pyrkhat bad pynbeit ia ki jingeh. Kumta, ka long kaba donkam ia ki nongialam ha ki kam ai jinghikai, ki riewshemphang ha ki polisi bad ki briew kiba la tbit ha ki jaka trei ba kin iatrei lang ban phylliew jingmut bad pynkhreh ia ka rukom treikam. Ha kane ka jingialang yn don khathynriew tylli ki session ha ki ar sngi naduh ka 29 haduh 30 tarik Naitung, yn pynlong ia ki jingiamir jingmut halor ka Jingioh ia ka Pule Puthi kaba bha bad ka jingsynshar, ka jingryntih bad ka jingpule kaba kynthup lang ia baroh, ki jingeh ba iadei bad ka Socio-Economically Disadvantaged Group (SEDG), National Institute Ranking Framework (NIRF), Indian knowledge System, ka jingwanrah ia ka rukom treikam hapdeng ka pule puthi bad ka jingpyntbit lypa na ka bynta ka kam, bad ka jingpynryntih ia ka pule puthi ha ryngkat kiwei kiwei ki kam.
Ha kine ki session yn don kumba 3000 ngut ki nongiashim bynta ba kynthup ia ki Principal Secretaru jong ka Tnat Pule Puthi / Skill jong ki Jylla / UT, ki Director jong ki IIT, ki NIT, ki IIIT, ki IISER, IISC, ki Vice-chancellor jong ki Skul bah jong ka Sorkar Pdeng, Jylla bad ki Skul bah jong ki riew shimet, ki heh duh jong kiwei kiwei ki HEI, ki nonghikai, ki Principal / ki khynnah pule jong ki skul, ki ITI, ki heh duh / ki dkhot jong ki Regulatory Body kum ka NCERT, CBSE, UGC, AICTE, NCTE, NCVET, ki SSC, NSDC, ki heh duh / ki dkhot jong ka CII, FICCI, NASSCOM, ASSHOCHAM bad kiwei kiwei.
Sa kawei ka bynta ba khring bha jong ka jingrakhe kadei ka multimedia exhibition kaba pyni ia ki sienjam ba biang tam na ki kam pule puthi ha ki skul bad ki jaka ai jinghikai ba kham halor. Yn don arspah tylli ki multimedia stall ban buh da ki jaka pule bad ka kynhun hapoh ka education and skill landscape, industry, bad kito kiba don bynta ha kane ka kam. Palat 2 lak ki nongiashim bynta kin leit jngoh ia ka exhibition ha ki ar sngi, kynthup ki samla pule, ki volunteer bad ki nongiashim bynta jong ka Yuva Sangam.
Kan don ka jingialang pynkut ia kane ka prokram kaba ar sngi. Yn plie ruh ia ka jingialang da u Myntri Sorkar Pdeng ba dei khmih ia ka Tnat Pule Puthi bad, ki Myntri Khynnah ba dei khmih ia ka Tnat Pule Puthi lem bad u Sanjay Kumar, Secretary, Department of School Education & Literacy, u K. Sanjay Murthy, Secretary, Department of Higher Education, u Atul Kumar Tiwari, Secretary, Ministry of Skill Development and Entrepreneurship, ki heh duh jong ki Autonomous Body, bad ki ophisar jong ka Tnat Pule Puthi bad Tnat Skill Development and Entrepreneurship jong ka sorkar pdeng.
Ban tip shuh shuh shaphang ki bynta ba kongsan jong ka National Education Policy 2020, sngewbha peit ha ka https://pib.gov.in/PressReleaseIframePage.aspx?PRID=1847066
NEP: Ka jingpynkylla ia ki jingthmu sha ki kam
