SHILLONG: U Myntri Rangbah ka jylla u Conrad K Sangma ha ka sngi Palei u la pynpaw iaka jingsngew khia halor ka jingbthah ka Deputy Commissioner ka East Khasi Hills ban khang dukan hapoh 10 baje mynmiet. Hynrei ha kajuh ka por, u la ong ba ka dei ka jingstad ka bor district ha ka jingbishar jongka ia ka jingdonkam ha kata ka por ban pynjari ia kane ka kyndon. U la ong ba ka jingkhang dukan slem ne plie kloi kan don jingiadei eiei bad ka jingbuh thong ka sorkar jylla ban poi ka kam khaïi pateng sha ka 10 Billion Dollar. U la kubur ba ka kam jngohkai kan ktah lada ka don ki jingjia kiba ktah ia ka suk ka sain bad kum kane ka ju jia kylleng ka pyrthei bad kaba donkam ka long ba ka sorkar kan peitngor bha ia kum kine ki jingjia.
Haba pynrem jur ia ka jingjia shah hiar thma ka myntri sorkar ka Kong Ampareen Lyngdoh ha iing sah jongka dang shen, u Myntri Rangbah u la ong ba kane ka jingjia ka long kaba sngewsih bad kam dei ban jia bad kiba donkti kin shah pynshitom katkum ka ain.
U Myntri Rangbah u la ong ba ka sorkar kan ym phai dien ban pyntreikam ia ka Roster system hynrei kan iaid nangne shakhmat. U la ong ba kaba donkam mynta ka long ban pyntreikam ia ka Roster system ha ka rukom kaba pura nangne shakhmat.
Halor ka jingdawa ban pynlong nongbah tlang iaka Tura, u Conrad u la ong ba kane ka dei ka jingdawa kaba la slem bha ha kaba ka iadei bad ka roi ka par jong ka thain. U la ong ba mynta ha ka sien ba nyngkong, ka sorkar ka la shna ia ki Mini Secretariat ha kylleng ki jaka.
Ka jingplie dukan miet ne khang kloi kam iadei ban poi sha ka 10 Billion dollar: Conrad
