SHILLONGg: U myntri rangbah ka jylla u la pyntip sha ki nongïalam ka Voice of people party hynnin ka 13 tarik naitung ba ka sorkar ka la dep ban jied ïa ki dkhot ka Expert committee ban peit pyrman biang ïa ka Reservation policy hynrei u la pan por ruh na ka VPP ba kan pyndep ïa ka jing jied ïa u Chairman u ban khlieh ïa ka Expert Committee.
“Ki lah don ki kyrteng iano ba kin thung kum u Chairman, te na ka liang jong ngi ruh ki la shu kylli katno kan shim por, na ka liang u myntri rangbah ruh u la ong ba ka nym shim por eh tang hapoh ar taiew eiei.” Ïa kane la ïathuh da u president ka Voice of people party hadien ka jingïakynduh bad u myntri rangbah lem bad ki dkhot ka seng ba kynthup ïa u Vice president u Dr Kara Chen, u general secretary Dr. Ricky Syngkon, u nongaiktien ka seng u Dr. Batskhem Myrboh.
Haba kren bad ki lad pathai khubor hadien ba la mih na ka kamra jong u myntri rangbah, u Bah Ardent Basaimoit President ka seng, ula pynpaw ïa ka jingkmen da kaba ong ba ka sorkar ka la shim khia halor kane ka kam, hynrei kaba sah mynta ka dei ban jied ïa u Chairman jong ka expert committee.
U la ong ba ka sorkar ka pan por na ki namar kadei ka kam kaba jwat bad kaba bun ka kynrum kynram bad, ka seng ruh ka kloi ban ai por ia kane, “ngi kwah ban ailad ia ka sorkar, na kata ka daw ngi wan hadien shibnai ka jingiakhih jong ngi”
U la ong ba kadei ia ki ban ailad aipor ia sorkar namar ka donkam ban jied bha ia ki dkhot ka Expert committee, bad u la pynpaw ia ka jingkmen ba ka sorkar ka la shim khia ia kane ka kam.
U la ong ba ka seng ka shim ia kane kum ka jingjop, nalor kane u Bah Ardent u la iathuh ba ka Voice of the people party ha ka jingiakynduh bad u myntri rangbah ki la iakren ruh halor kiwei pat ki mat ba ktah ia ka suk ka saiñ jong ka jylla, halor ka jingshah khñiot beiñ ki nongrep, bad kumjuh halor ka jingialeh ki nongniah taxi ha kaba iadei bad ka odd even system, ka order na ka Deputy Commissioner halor ka jingkhang dukan ha ka por 10 baje kaba u paidbah u la pynpaw ia ki jingeh ha kine ki sngi ba ladep, bad kumjuh ruh halor ka mat kaba kongsan tam mynta ka jingkiew dor ka marbam mardih ha ka jylla.
U la ong ruh ba ka seng ka la iakren ruh halor ka jingpynlip bording khah khah, bad u la ong ba na ka liang u myntri rangbah u la iathuh ba ha kine ki khyndiat sngi kan sa pynduna noh ia ka jingpynlip bording.
U la ong ba na ka liang jong ka sorkar ka la ai jingkular ha khmat ki nongialam ka VPP ba kin sa leh ia kiba donkam ha kaba iadei bad kane ka jingai jingmut bad ka jingtyrwa jong ka seng.
Nalor kane, u la ai ka jingiaroh ruh ia ki nongniah taxi namar ki kloi ban mih paidbah ban ïatylli lang ban dawa ia ka hok ban pyrshah ia kino kino ki jingai hukum kiba mih na ka sorkar kiba ktah mationg ia ka pliang ja u paidbah. U la ong ba ka VPP ka ïeng ryngkat bad ki paidbah ha ki jingdawa ba shongnia bad ha ka lynti kaba jai jai.
Hun jrut ka VPP ia ka jingpynkhreh ka sorkar halor ka Expert committee ban bishar biang ia ka Reservation policy
