SHILLONG 04, Naitung: Phra ngut ki dkhot ka seng Hynniewtrep National Youth Front (HNYF) kila lait phatok hynnin ka miet hadien kumba 2 bnai ba kila shah set byndi hadien ba kila shah kem halor ka jingshah kynnoh ba ki donkti ban pynklumar ha Khyndai Lad. La set ia ki ha Shillong District Jail.
Kine ki phra ngut ki dei napdeng ki 10 ngut ki dkhot ka HNYF kiba la shah kem naduh ka 9 tarik Jymmang 2023, ha kaba ki pulit ki la leit ban kem na ki ïing sah jong ki halor ka jingshah kynnoh ba ki la thaw jingklumar ha Khyndailad.
Ha kane ka miet, ia kine ki phra ngut la wan shaw da ki kmie ki kpa bad kiba haïing hasem ha ka jingwan shynran lang ki dkhot ka HNYF.
Haba kren sha ki lad pathai khubor, u President ka HNYF East Khasi Hills u bah Bless Dkhar u la ong ba bunsien ia ki dkhot sengbhalang, ym pyllait ha ka por mynsngi hynrei la pyllait ha ka por mynmiet bad ia ka daw, baroh la iatip hi.
U la ong ba ka seng kan ym tieng ym smiej halor kane ka jingshah kem jong ki dkhot hynrei kan tur beit ban shakri ia ka ri bad ka jaitbynriew.
Lait phatok ki dkhot ka HNYF ha ka por synïa
