SHILLONG 03, Naitung: Ka KSU Shillong Mihngi Circle mynne ka sngi ka la kynduh ia ki bor pyniaid ka North East Institute of Ayurveda & Homeopathy (NEIAH) hadien ba ki la ioh jingtip ba ka Director jong kane ka skulbah ka la thep kam jubor ia kawei ka briew na Uttar Pradesh kum ka Contractual Attendant.
Ki dkhot ka seng ki mana ia kane ka skulbah ba ka dei ban weng noh mardor ia katei ka briew kaba nabar bad dei ban thep beit da ki Khasi ha ki kam contractual baroh.
Ki dkhot ka seng ki la mana ruh ba ym dei ban regularise jubor ia kino kino ki bar jylla ba trei contractual ha NEIAH.
Khatduh khatwai ka seng ka maham ba lada ki bor pyniaid ka NEIAH khamtam ka Director kim weng kam ia katei ka bar jylla, ka seng kan sa shim da ki sienjam kiba tyngeh. Kane ka long katkum ka kyrwoh na u bah Sonstar Nongkhlaw u President KSU Shillong Mihngi Circle.
Tuklar ka KSU ban sangeh thep kam ia ka briew na Utter Pradesh ha NEIAH Shillong
