SHILLONG 03, Naitung: Ka Federation of Riwar Mihngi Local Durbars (FORMLD), ka sngewkhia shibun, halor ka jingjia, kaba la jia ha ka miet Sngi U Blei ba ladep, ha Lad Umsyiem, ha kaba ka la don ka jingmynsaw jong ki samla trai shnong, na ka jingshah shoh shah bom ha ki shipai BSF, kiba don ha katei ka ktem.
Ka seng, ka pynsngew ruh, ba kane ka jingjia, kaba la jia ha Lad Umsyiem, ka wan jia, tang hadien shibnai shiteng, jong ka jingshah siat iap, uwei u draibar trok, harum Mawshun, ha ki shipai BSF.
Ka FORMLD, ka sngew ba ka jingteh lakam ia ka suk ka sain, kam dei ha ka kti jong ki BSF, hynrei, ki la dei ban pan jingiarap, mar mar na ki pulit kiba don ha Dawki bad ba kin jin da la leh kumta, kan nym jin da la don satia ka jing iakynad kaba la neh slem ha katei ka miet bad ka seng, hi ka shim, ba kito ki samla kiba shah shoh, ha ki BSF, kim dei satia, ki nongkhaii mar tuh, hynrei, ki dei ki samla trai shnong, kiba shah shoh khlem daw, namar ba ki iaid lynti, ban leit sha la ki kam, lyngba katei ka surok bah.
Ka FORMLD, kaba dei ka seng jong ki khlieh nongsynshar ka thain Riwar Mihngi, ka sngew pyrshah jur ruh ia ka jingkren U Conrad Sangma, myntri rangbah ka jylla, ha kaba ula kynnoh, ba ki dei ki nongkhaii mar tuh, kiba leit pynkulmar ha ka ktem jong ki BSF, namar ba U Rangbah Shnong ka Umsyiem, ula kren shai, ba ka jingkulmar ha katei hi ka miet, ka dei na ka jingthaw kulmar jong ki shipai.
Ka synjuk ki khlieh nongsynshar, ka dawa namarkata ia ka sorkar jylla, ba kan pynbeit mardor ia kane ka jing iakynad kaba iai jia man ka por, hapdeng ki BSF bad ki riew paidbah, ha shwa ba kin mih kino kino ki jingiakynad ki ban kham jur bad ki ban ktah ia ka suk ka sain jong ka thain Riwar Mihngi hi baroh kawei. La ong ka kyrwoh na u bah HR Khongsdir, Vice President, FORMLD.
Shah shoh khlem daw ki samla ha ki BSF ha Lad Umsyiem, ong ki nongsynshar shnong Riwar
