SHILLONG 03, Naitung: Katkum ka kaiphod ka sorkar jylla na ka State Disaster Management Authority ki don 199 tylli ki shnong ba shah ktah bad 13 hajar tam ki briew ba shah shah bad ar ngut kiba dang jah bad 7 ngut ba mynsaw bad 27 tylli ki mrad ba iap naduh ka 1 tarik Jylliew haduh ka 30 tarik Jylliew 2023.
Haba pyntip sha ki lad pathai khubor, u myntri ka tnad iada mariang, u bah Kyrmen Shylla u la ong ba ka tnad ka la pynlong ia ka jingbishar bniah ia ka jinglong jingman jong ka jingshah syllad ha ka bor jong ka mariang ha kine ki sngi ha kylleng ki jaka ka jylla.
Hadien ba wai ka jingialang bishar ia ka jinglong jingman ka jingshah pynjulor mariang, u bah Kyrmen Shylla u la ong, “ha kane ka kyndon ka tnad iada mariang, la pynhap lang ia ka jingshah pom pyrthat kum ka jingpynjulor ka mariang bad kiba shah ktah kin ioh ia ka jingiarap bad kumjuh kito kiba shah hiar thma ha ki mrad ruh yn sa kynthup lang shen”.
U la pyntip ba kito kiba shah ktah ha ka jingjulor ka mariang ha kine ki sngi, ki don 12 ngut kiba duh ia ka jingim bad 7 tylli ki longïing kila ioh jingiarap katba ia kiwei dang bishar bniah la ki hap ne em ha ka jingiarap ka tnad iada mariang namar ba ki dei ki jingjia aksiden.
Ha kajuh ka por, u la pyntip ba ka sorkar ka la pynkhreh ban leit surbe ia ki jaka ba shah ktah da u kot kudi nar (drone) ha kine ki sngi ban wan nalor ban pynbiang ia ki tiar kiba iade bad kane ka kam.
U myntri u la pyntip ruh ba la pyllait T. 78.37 lak sha East Khasi Hills, ia ka West Khasi T. 63.37 lak, ia ka South West Khasi T. 58. 37 lak, Eastern West Khasi T. 54.37 lak, Ri-Bhoi T. 54.37 lak, West Jaintia Hills T. 54.37 lak, East Jaintia Hills T. 54.37 lak, West Garo Hills T. 58.27 lak, East Garo Hills T. 59.37. lak, South Garo Hills T. 59.37 lak, South West Garo Hills T. 58.37 lak, bad ka North Garo Hills la pyllait T. 54.37 lak.
U la ong ba ka sorkar jylla ka la ioh bhah na ka 15th Finance Commission ha u snem 2021-22 T. 58.40 klur, ha 2022-23 T. 60.80 klur, ha 2023-24 T. 64.80 klur, ha 2024-25 T. 67.20 klur, bad ha 2025-26 T. 71.20 klur bad kane ka kynthup ia ka 10 percent na ka pla ka jylla.
Kiba pom pyrthat, kiba shah hiar thma ha ki mrad khlaw kin hap ha jingpynjulor mariang
