SHILLONG 27, Jylliew: Ki nongdie bad nongshalan dohkha ki dang sah ha ka umdum hadien ba ka kaiphod jong ka test ia ki dohkha ba la wan leh ki briew na ka tnad Fishery mynta ka sngi, kim lah ban pyntip noh hashen kumba ju long mynshwa.
Mynta ka sngi, ki briew na ka tnad Fishery kila wan ban test ia ki dohkha ha Khliehiewduh kiba wanrah nabar jylla hadien ba la kut ka jingkhang ban wanrah nabar kaba la iaid sha ka 15 sngi kynthih naduh ka 8 tarik mynta u bnai hadien ba la lap ia ka jingdon ka dawai formalin ha ki dohkha.
Ha ka 24 tarik, ka Commissioner ka Food Safety ka la weng noh ia kane ka jingkhang ban wanrah dohkha nabar jylla hadien ba la kut ka jingmana hynrei ka jingartatien bad ka jingsngew bym khuid mynsiem ka dang don ha ki nongdie bad ki nongkhaïi hadien ba kim ioh ia kaiphod jong ka test ba la shim nongmuna na ki dohkha.
Haba kren sha ki lad pathai khubor, ki nongdie bad nongshalan dohkha, kila pynpaw ia ka jingsah umdum bad kim sngew khuid ban die ia ki dohkha namar ba ka test kaba la leh ka tnad Fishery mynta ka sngi, kim pat lah ban ai ia ka kaiphod namar ba kim iathuh la ki dohkha ba wanrah mynta ki don formalin ne em.
“Ki dohkha kin sa pyut lada buh slem bad katkum ka jingong ki ophisar ba wan test, kim lah ban iathuh eiei hynrei kin sa phah sha ki bor ba halor ban pynbna ia ka jinglap ka test mynta ka sngi. Ngi kyntu iaka sorkar ba kan ai noh ia ka kaiphod ka nongmuna shen shen shisien ba la dep leh ia ka test, khnang ba ngin sngewthuh ban die ia ki dohkha bad ban phah sha kiwei ki jaka”, la ong ki nongkhaïi dohkha.
Ki dohkha ba la wanrah mynta ka sngi na Andra Pradesh ki long khabah, pyngkas, khabaw.
Ki nongdie dohkha ki la ong ba mynshwa shisien ba ki la wan test ia ki dohkha, kila pynbna noh hashen hi ia ka jinglap bad kane ka la pynsuk mynsiem bad ka la pynlait ia ka jingkulmar ia ki nongdie hynrei mynta, ka jingpynslem ka sorkar ban ai ia ka kaiphod ka la buh ia ki ha ka umdum namar ba kim sngew nang shuh ban die ne em watla ka jingkhang ban wanrah dohkha nabar ka la pyllait.
Shaiong ngain ki nongdie dohkha bym thikna lano ban ioh kaiphod na ka test
