SHILLONG 27, Jylliew: Ka sorkar jylla mynta ka sngi ka la pynkylla ia ka Office Memorandum (OM) kaba pynmih ha u snem 1974 halor ka Roster Reservation da kaba weng noh ia ka kyndon kaban ailad ia ki Garo bym dei na Meghalaya ban ioh kam ha kane ka jylla.
Haba kren sha ki lad pathai khubor mynta ka sngi, ka nongaiktien ka sorkar ka kong Ampareen Lyngdoh ka la ong, “ngi la pynkylla ia ka OM jong u snem 1974”.
Ka kynhun myntri ka la pynkylla ia ka Office Memorandum kaba pynmih ha 1972 ha kaba iadei bad ka jinglait ki kam ia ki ST bad SC kaba la ong ba ki kam ba lait duna ia ka 9 tylli yn mang ia ki nongshong ba kyrpang bad la pynduh noh ia kane bad la pynjari da ka Roster System, kaba mut ba ka jingrung kam kan long katkum ka Roster ym shuh ia ka jingdon ki kam ba lait.
Ka la pynkylla ruh ia ka OM jong u 2020 ha kaba iadei bad ka jingrung kam jong kiba duna dkhot met (Persons with Disabilities-PWDs), bad nangne shakhmat ka jingpynrung kam kan long katkum ka Roster.
Ka la bynrap ruh ia ka kyndon ha ka OM jong ka Reservation Policy ia kiba aplai kam ba ia ki kam ba lait ha ki district, yn jied ia kiba nang ha ktien lajong jong kata ka jaka lyngba ka District Selection Committee.
Kiwei pat ki rai ka sorkar mynta ka sngi, ki long la pynkylla ia ka Meghalaya District Court Ministerial Service 2020 ha kaba ia ki kam ym lah ban pynkynriah bad ki District Selection Committee (DSC) kin pyntreikam ia ka jingthungkam.
Ka la pynkylla ruh ia ka schedule IV jong ka Meghalaya Delegation of Finance Power Rules 2006, kaban ai bor shuh ha ka liang ka pisa tyngka ia u DGP/IGP/DIGP/SP ha ki kyrdan bapher bapher.
Pyndam ka sorkar ia ka OM 1972, 1974 ba ka plie lad ioh kam ki Garo bym dei na Meghalaya
