SHILLONG 26, Jylliew: Ka MLA ka Sutnga-Saipung ka kong Santa Mary Shylla ka la ong ba ka East Jaintia Hills ha kaba ka konstitwensi kaba ka mihkhmat, ka dei kawei kaba shah ktah bha ha u dork namar ba ka dei ka jaka iaid lynti sha kawei ka jylla.
Haba kren ha ka jingiakop iatyrko ba la pynlong ka NPP halor u drok mynta ka sngi, ka kong Santa ka la ong, “Ka konstitwensi jong nga dei ka lynti iaid sha kiwei ki jylla, ki samla ki shah ktah na u drok”.
Ka ka bynrap, “Ha kine ki sngi, ki pulit ki ioh kurup bun kilo u drok ha surokbah NH06 kaba hap ha konstitwensi jong nga bad kane ka pyni ia ka jingma ia ki samla ka jylla”.
Ka la ong ba u drok u dei u jingma ia ka briew, ia ka iing ka sem bad ka imlang sahlang namar ba shisien ba u briew u la ngop, la jwat ban ieh bad ka la dei ban ieng baroh ban ialeh pyrshah ia une u jingma jong ka jingim bad ka imlang sahlang. Ka la ong ba ka sorkar bad ki pulit kim ym lah ban iakhun pyrshah ia u drok hynrei ka dei ka bynta jong baroh lang kiba don ka jingkitkhlieh ia ka imlang sahlang.
“Samla baieid, wat ngop ha u drok, long kiba khlain ban ieng pyrshah bad kum ki samla dei ban ieng ha u lain ba nyngkong ban ialeh pyrshah ia une u jingma”, ka la ong.
Ka la ai jingmut ba ka jingiatai jingiathir ban pynlong ia kum kane ka prokram ha man ki district bad ki jaka khamtam sha ka thain ba ka mihkhmat namar ba u la kynrei bha une u jingdih ba sinew.