Ka jaka sah pyngngad ha Umkaber ban khring ia ki nongwankai

LYNGIONG 25, Jylliew: Ha ka sien ba nyngkong la plie ia ka jaka sah pyngngad ha ka them Lyngiong Tyrsad lyngba ka Destiny SHG ha ka shnong Umkaber, Lyngiong Lyngdohship ha ka 24tarik u Jylliew,2023 kaba la ai kyrteng da ka Riverside Adventure Camp.
La plie paidbah ia kane ka jaka sah pyngngad da u Bah Tambor Lyngdoh uwei na ki nongialam ka Synjuk ki Hima Arliang ki Hima Wah Umiam Mawphlang Welfare Society ha ka jingdon ryngkat u Bah Staising Kharbteng,ki Nongialam Shnong,ki Nongialam bad dkhot ka Destiny SHG.

Haba kren kum u Kongsan u Bah Tambor Lyngdoh u la ai khublei ia ka Destiny SHG kaba la sien ia kane ka sienjam ka ban long ka jingiarap ia ki nongwan jngohkai pyrthei ban ioh ia kum kine ki jaka shongthait haba ki poi sha kane ka thaiñ bad iaroh ia kane ka kynhun kaba la mait phang ia kane ka bynta.
U Bah Staising Kharbteng haba ai jingkren u la pynpaw ba kane ka dei ka sienjam ba khraw ba la shim da kane ka kynhun kum shibynta ban kyntiew ia ka ioh ka kot ki longkmie bad ki longïing longsem. U la ong ruh ba ka dei ka burom ia ka thaiñ ha kaba yn lah ban pynpaw pyrthei ia ka jingitynnad ka mariang ha ka thaiñ kaba don kyrhai ki jaka ki ban khring ia ki briew kiba na shabar ban wan jngohkai.
La ioh ruh ia ka jingkren na i Bah Bruce Hadem iba dei u Rangbah Shnong bad ki nongialam ka Destiny SHG.