SHILLONG Jylliew (PIB Shillong): Ka President jong ka ri, ka Droupadi Murmu ka la sam ia ki khusnam National Florence Nightingale Award na ka bynta u snem 2022 bad 2023 sha ki Nurse ha ka jingialang ba la long ha Rashtrapati Bhavan mynta ka sngi.
Ka Kong Reliance Pyrngap na jylla Meghalaya ka la iohpdiang ia ka khusnam National Florence Nightingale Award na ka bynta u snem 2022 na ka bynta ka jingtrei shitom jongkai. Ka Kong Pyrngap ka la trei palat 35 snem kum ka ANM bad LHV. Ka la ai jingshakri sha ki briew ha Saipung Primary Health Centre bad mynta ka trei ha Sutnga Community Health Centre, East Jaintia Hills, Khliehriat, Meghalaya.
Ka Kong Pyrngap ka long kaba tbit ha ka kam bad kaba kloi ban iarap haba don kano kano ka jingeh ha ka imlang sahlang. Dei ban ai jingiaroh ia ka jinglong nongialam, ka jingtrei shitom bad ka jingsngewlem jong ka. Ka Kong Pyrngap ka la pyllait im ia shibun ki briew ha ka por ba don jingeh ha ki por kha khunlung. Ka la pyntbit ialade da kaba iashim bynta ha ki prokram CNE bapher bapher ba la pynlong ha ka ri, ha jylla bad ki distrik. Ki paidbah bad ki bor pyniaid distrik ki la ai jingiaroh ia ka jingai jingshakri jong ka Kong Reliance Pyrngap sha ka imlang sahlang.
Ha ka jingiakren bad ka PIB Shillong, ka Kong Pyrngap ka la pynpaw ka jingkmen jongka ha kaba ka la ong, “Nga Sngewkmen bad sngewhun ban ioh ia kane ka jingithuh na ka bynta ka jingtrei shitom jong nga bad nga la pyrshang ban ai shispah per cent naduh ba sdang haduh ba kut u snem,” da kaba bynrap ruh, “ba kalong kaba kham eh ban ai shispah per cent hynrei kane kam shym la pynsangeh ia nga na ka jingtrei shitom kaba la pynpoi ia nga sha une u pud ban ioh ia kane ka khusnam.”
“Nga kwah ban kyrpad ia ki paralok jong nga kiba dang trei ba kin trei shitom ban kot sha une u pud jong ka jingjop na ka bynta kane ka kam kaba kongsan kaba ngi ai jingshakri sha ka imlang sahlang,” ka la bynrap.
Haba pynpaw ka jingsngewnguh ia ka Sorkar India bad ka Sorkar Meghalaya kiba la jied ia ka na ka bynta kane ka khusnam, ka Kong Pyrngap ka la ong, “Kane kadei ka jingithuh jong ka sorkar ia ka jingtrei shitom jong nga.”
Ka Myntri ba dei khmih ia ka Tnat ka koit ka khiah jong ka sorkar Meghalaya, Dr. Ampareen Lyngdoh ka la ai khublei ia ka Kong Pyrngap halor ka jingjop jong ka, ha kaba ka la ong, “Nga kitbok kitrwiang bad nga ai khublei ia ka kong Reliance Pyrngap, Lady Health Visitor na Sutnga CHC, East Jaintia Hills kaba la ioh ia ka khusnam National Florence Nightingale Award. Kane ka jingai jingithuh ka pyni ia ka bynta kaba khraw ba ka la don kum ka nurse bad ka dei ka dak jong ka jingshim khia bad ka jingtrei shitom jongka ha ka jingai jingsumar ia ki briew.” Da kaba ong ba ka Sorkar ka ieng skhem ban ai jingithuh ia ka jingtrei shitom, ka Dr. Lyngdoh ka la ong, “Ngi ai jingburom ia ka kong Reliance Pyrngap bad baroh ki nongai jingsumar kiba ai jingshakri ia ka imlang sahlang, kiba kyntiew ia ka jingim jong ki briew bad kiba wanrah ia ka jingbha kaba neh.” Ka jingbahkhlieh bad ka jingsngewlem jong i ka ai mynsiem ia ngi baroh bad ka Sorkar ka pynpaw ia ka jingsngewnguh ia ki kam kiba ka la leh ha ka jingai jingsumar, la bynrap ka Dr. Lyngdoh.
Ka Tnat ka koit ka khiah jong ka sorkar India ka la sdang ia ka khusnam National Florence Nightingale Award ha u snem 1973 kum ka dak ka jingithuh ia ki jingai jingshakri jong ki nurse sha ka imlang sahlang.
Ioh pdiang ka Kong Reliance na Meghalaya ia ka khusnam National Florence Nightingale 2022
