SHILLONG, Jylliew: Ka UDP ka la pynpaw ia ka jinglyngngoh halor ka jingphet syndet ka NPP na ka shatri ka UDA ha KHADC haduh b aka EC ka la khyllem noh mynta ka sngi.
Ka jingialang kyrkieh ka UDP kaba iashong mynta ka sngi, ka la pynpaw ia ka jingsngew lyngngoh namar ba kam tip bha ia ki daw ba ka NPP ka la mih syndet ban leit iatreilang bad ka Congress ha KHADC.
Haba kren sha ki lad pathai khubor, u president ka UDP u bah Metbah Lyngdoh u la ong ba haduh mynta ki sngew lyngngoh ha kano ka rukom kila iapynbeit ha KHADC.
“Ka jingiapynbeit b aka party naduh bas dang,ka don ka jingiasngewthuh jingmut haduh ki nongialam ka party naduh u 2019. Hynrei ka jingwanrah ia ka jingbym shaniah shuh mynta ka sngi, ngim shym la tip ban don kaba kum kata, la shu wanrah kynsan kynsan ha ka dorbar sdang ka jong ka dorbar lyiur mang tyngka”, la ong u bah Metbah.
U la ong ba ka parti kan iakren bad u Myntri Rangbah halor kane ka jingkylla syndet ha KHADC. “Ngin pynsngew sha u Myntri Rangbah ha kaba iadei bad kane ka jingjia, te hynrei kane ka dei ka kam jong ki MDC ha KHADC, barabor ngi ieh ha ka jingstad jongki MDC, namar ba dei maki hi, kiban iashim ia kano kano ka rai namar ba ki dei ki nongmihkhmat ba la jied u paidbah”, la ong u bah Metbah.
U la ong ba ha ka jingiatreikam, ka lah ban don ka jingduna hangne hangtai hynrei kam long ban shu ban iapynkhyllem. “Ha ka jingiatreikam ka lah ban don hangne hangtai, kaba bha kam long ban shu iapynkhih ban iapynkhyllem ia ka EC man ka sngi, hynrei ka donkam ka jingiakren ka jingiatai ka jingiasngewthuh jingmut kaba shai hapdeng jongki seng sain pyrthei kiba iadon lang ha ka kynhun. Kumba ka long mynta ka EC ka long jai jai kam don kano kano ka jingjia kaban wanrah haduh une u pud ban rah ia ka jingbym shaniah shuh hynrei mynta ka sngi, shu kynsan kynsan, ngim lah ban sngewthuh kaei ka jingthmu”, la bynrap u President ka UDP.
Ha kajuh ka por, u la kyntait ba kan don kano kano ka jingktah ia ka jingiatreilang ha ka sorkar jylla watla ka don ka jingiaphoi ha KHADC. “Ha kaba iadei bad ka sorkar jylla, kam don eiei ka jingiapyrkhat da kumwei, na ka liang u Myntri Rangbah ruh um ong eiei ba kam don shuh kata ka jingiatreilang ha ka sorkar”, la ong u bah Metbah.
Shaiong ka UDP ba shah shet ha ka paralok NPP ha KHADC
