SHILLONG, Jylliew: Ka Executive Committee kaba ialam u Chief Executive Member u bah Titosstarwell Chyne ha Khasi Hills Autonomous District Council kala khyllem noh mynta ka sngi hadien ba ka la duh ia ka jingbun paid.
Shwa ban sdang ka dorbar lyiur mang tyngka ka Council, ia ka mat bym shaniah shuh ia ka EC la wanrah u MDC ka NPP na Rambrai u bah Bajop Pyngrope bad la kyrshan 17 ngut ki MDC kynthup na ka NPP bad ka Congress.
Ha ka jingshisha ka NPP bad ka UDP ki iadon lang ha ka EC hapoh ka lama ka United Democratic Alliance (UDA) ha kine ki saw snem hapoh ka jingialam ka UDP.
Haba wanrah ia ka jingbym shaniah shuh ia ka EC ba ialam u bah Titosstarwell, u bah Bajop ula ong ba ki 17 ngut ki MDC kim don shuh ka jingshaniah ia ka EC ba ialam u CEM bah Titosstarwell namar ka rukom treikam jong u, kam iahap shuh kumba ka dei ban long, ha kaba ula shu leh hi marwei ia ki kam ka Council.
Hynrei haba jubab halor kane, u bah Titosstarwell ula ong ba kam don kum kata ka jingleh marwei bad kano kano ka kam jong ka Council la leh da ka jingiarai bad jingiatip lang.
Ula pynpaw ia ka jingbitar da kaba tied miej, ba ka long kaba sngewsih ban shah shet ha ki paralok ba iatreilang. “Ki la dung ia nga bad lada hangne ngi don tang 30 ngut ngi iashet kylla, katno sien kin shet ia ki paidbah lei”, la ong u bah Titosstarwell.
Na ka liang u Chairman u bah Lamphrang Blah ula pynbna ba ka EC ba ialam u bah Titosstarwell kala duh ia ka jingbun paidbah bad ka jingjied ia u CEM thymmai kan long lashai ka sngi.
Haduh ka por ba la buh ban thep kyrteng mynta ka sngi na bynta ka shuki CEM, la ioh pdiang tang ia ka kyrteng u bah Pyniaid Sing Syiem na ka NPP ba kyrshan lang ka Congress.
Lada kam don da kumwei pat, ka shuki CEM kan leit sha u bah Pyniaid uba dei u MDC na Sohryngkham.
Ka NPP bad ka Congress kila thaw ruh ia ka Khasi Hills Democratic Front ban ialam ia ka EC thymmai.
Thaw ka NPP bad Congress da ka KHDF
Ka NPP bad ka Congress ka la thaw ia ka Khasi Hills Democratic Front (KHDF) hadien ba ka la mih noh na ka ïing ka United Democratic Alliance (UDA) kaba ialam ka UDP ha Khasi Hills Autonomous District Council (KHADC) mynta ka sngi.
Ka NPP (12 ngut) bad ka Congress (6 ngut) kiba don 18 ngut ki MDC, kila pynkhyllem noh ia ka Executive Committee kaba ialam ka UDP ha ka dorbar lyiur mang tyngka kaba sdang mynta ka sngi.
Ka NPP, ha ka jingshisha, ka don ha ka UDA hapoh ka jingialam ka UDP lem ka HSPDP, bad MDC shimet hynrei hadien saw snem mynta ka la mih noh ban thaw ïing bad ka Congress.
Mynta ka sngi, u MDC ka NPP na Sohryngkham u bah Pyniaid Sing Syiem u la thep kyrteng ban iakhun ia ka shuki Chief Executive Member (CEM) ka KHADC bad haduh ba la kut ka jingthep kyrteng, dei tang ka kyrteng jongu marwei kaba la thep ha u secretary ka Legislative ka Council.
Ia kane ka shatri KHDF yn khlieh u bah Pyniaid S Syiem kum u Chairman katba u MDC ka Mawlai u bah Teibor Pathaw un long u Secretary.
Ha ka ïing kaba 30 ngut, ka NPP ka don 12 ngut, ka Congress 6, ka UDP 10, HSPDP 1, IND 1.