SHILLONG 17, Jylliew: Ka Rangdajied United FC ka la long ka lahduh jong ka lympung Meghalaya State League 2023 hadien ba ka la pynliem ia ka Khliehmawlieh Youth Club da 1-0 ha ka jingiaknieh ia ka nam lahduh mynta ka sngi ha madan SSA Stadium.
Ia kane kawei ka kol jong ka jingjop ia ka Rangdajied la thep u Wanlamsuk Nongkhlaw ha ka 9 minit ha ka jingialehkai ba la wan sakhi da bun bah ki nongpeitkai.
Ki heh sorkar kiba sakhi lang ha kane ka sngi ki long u Symbud Myntri Rangbah u bah Sniawbhalang Dhar, Adviser jong u Myntri rangbah bah Hamletson Dohling, u Additional Chief Secretary u Dr (Shri) P Shakil Ahammed, ka Deputy Commissioner ka East Khasi Hills kong RM Kurbah, Secretary ka tnad ialehkai kong R Sohkhlet, u MLA barim uba dei ruh u nongialehkai ka ri u Eugeneson Lyngdoh, bad kiwei.
Ki club ba iasoh bad ka MFA kila ioh mar T. 2 lak kum shi bynta ka jingpyrshang ka MFA bad ka sorkar jylla ban kyntiew ia ka kynjatbol ha ka jylla.
Ki club kiba ioh rung ha ka MSL ki ioh mar T.1 lak katba kiba poi ha ka semi final ki ioh mar T.1 lak. Ka Khliehmawlieh kaba long baar ka ioh T.3 lak katba ka Rangdajied United ka ioh T. 5 lak.
U Donlad Diengdoh ka Mawlai SC u la ioh ia ka khusnam Golden Boot kum u nongthep kol ba bun tam haduh 15 kol. U nongapkol ka Rangdajied u Banshanlang Sten ula ioh ia ka Golden Glove katba ka Golden Ball ka leit sha u Tremiki Lamurong kum u nongialehkai ba tbit tam.
Toiñ liem ka Khliehmawlieh ha ka Rangdajied Utd ha ka MSL 2023
