SHILLONG 15, Jylliew: Ka sorkar jylla ka la pynmih ia ka jingmaham ia ki nongtrei sorkar ba kim bit ban iadon bynta ha ki kam sain pyrthei bad kiba leh pyrshah kin ngat ha ki kyndon ka Meghalaya Service (Conduct) Rules 2019.
Ha ka jingpynbna kaba pynmih mynta ka sngi, ka Commissioner & Secretary to the Govt. of Meghalaya, Personnel & A. R. (A) Department, ka kong Ripnar Lyngdoh ka la ong ba ka la ioh jingtip ba ki don shibun ki nongtrei sorkar kiba la iashim bynta pyllein pyllein ha ki jingialang paidbah, ki jingialum paidbah ba la pynlong ki seng sain pyrthei kaba long ka jingpynkhein ia ka Rule 20 (1) jong ka Meghalaya Services (Conduct) Rules, 2019, kaba ong, “Ki nongtrei sorkar kim dei ki dkhot ne pyniasoh bad kano kano ka seng sain pyrthei lane kano kano ka seng kaba iashim bynta ha ka politik lane ki kam kiba iadei bad ka sain pyrthei ne ban iashim bynta ne ban iarap ne kyrshan ha kano kano ka rukom ia kano kano ka seng sain pyrthei”.
La ban jur bad kyrpad ia baroh ki nongtrei sorkar ban buh pyrkhing ia ki Rule bad ban kiar na kaba iadon bynta ha ki kam kiba long pyrshah ia ka sorkar bad kino kino ki shakri sorkar kiba pynkhein ia ki jingbthah, kin shah pynshitom katkum ka Rule 20 jong ka Meghalaya Services (Conduct) Rules, 2019.
Ka la bthah ruh ia baroh ki tnad sorkar ba kin pyntreikam pyrkhing ia kane ka hukum.
Pynap ka sorkar da ka MSCR ia ki nongtrei sorkar ba leh shalak ha kam politik
