SHILLONG 15, Jylliew: Ka jingweng kam noh ia ka chairperson barim jong ka Meghalaya State Commission for Women (MSCW), ka Kong Phidalia Toi, kam dei satia da kaba shu sngap ia ka khubor ka khlieng ka tyngab.
Ia kane la ong u myntri ka tnad Social Welfare u bah Paul Lyngdoh haba kren sha ki lad pathai khubor mynta ka sngi.
U Bah Paul u la pynphai hadien ba ka kong Phidalia ka la pynpaw ia ka jingpyrshah ia ka rai ban weng noh ia ka, da kaba pynpaw ba ka long pyrshah ia ka ain Meghalaya State Commission for Women Act, 2005.
“Ngam pynmih ia ka hukum tang na ka khubor ka khlieng ka tyngab. Nga la pule bniah ia ki sakhi (file) ha kaba ka don ka kaiphod kaba bniah bha bad ka Chairperson kaba dei ban poi sha ka jingialang 4 tylli, kam ju wan satia kumba la kdew ha ka sakhi. Ka la don ruh ka jingujor pyrshah ia ka ba ka donkti ha ka elekshon”, la ong u bah Paul.
“Ka suk ban shu kynnoh ia ka sorkar. Haba ngim leh, ki paidbah kin kylli balei ngi shu sngap, bad haba ngi leh, ki kylli balei phi leh. Nga la pule ia ka Women Commission Act, nga la pule ia ki jingthoh ha ki sakhi (files) bad nga tip kaei kaba nga leh”, la bynrap u bah Paul.
“Nga kham lah ban leh ia kaba dei ban ia kaba pynpaw nam ialade. Lada u kpa u kwah tang ban pawnam un ai da u pu kyllain (donut) ia ki khun hynrei lada kwah ban leh ia kaba dei, un ai da ka ja kaba tei met, phin jied u kpa ba pawnam ne uba leh ia kaba dei”, la ong bah Paul.
Ha kawei ka liang u Bah Paul u la ong ba ka tnat kan buh ia ka Search Committee ban wad ia ka Chairperson ba thymmai, bad ka bym don jingiadei ha ka sainpyrthei ne politik, bad ka ban dei ka briew kaba sngewthuh bruh ia ka bit ka biang ki kynthei.
Nga kham lah uba dei ban ia uba pawnam: Paul
