SHILLONG 08, Jylliew: Mynta ka 8 tarik Jylliew 2023, ar ngut ki briew kila shah kem bad uwei dang shah thwet ha ki pulit hadien ba kila ktah bad jrong kti ia kawei ka samla lud bym pat dap 18 snem bad ia u paralok jongka, ha Risa Colony.
Katkum ka kyrwoh na u SP ka East Khasi Hills, la ioh jingujor na u Secretary ka Risa Colony ha ka por 7baje janmiet jong ka 6 tarik Jylliew 2023, ba ki don katto katne ki briew kiba jrong kti ia kawei ka samla lud katba ki ki iaid kai ha khlaw Risa Colony bad ki pulit ka Laitumkhrah mar mar kila mareh sha jaka bad kila lap ba kawei ka samla lud bad uwei u shynrang ba 18 snem, ban iaid kai janmiet hynrei kila wan khang ki lai ngut ki briew .
Kine ki runar kila byrngem ruh ia ki ba ki wan iaid kai sha katei ka jaka bad kila dawa ba dei ban siew ia ka kuna. Ar ngut na kine ki runar kila sdang ban shoh ban dat ia u shynrang uba paralok jong katei ka samla lud bad uwei u la jrong kti ia ka. Paralok shynrang kane ka thei lud ula kyrpad ba kin ym ktah kti ia ka bad ban pynlait noh bad ma u, un leh ia kaei kaba ki dawa hynrei kine kila law ia ki sopti jong u bad lute ia kiba don ha ka met jong ki. Katba kine ki ar ngut ki dang bunkam ban tied ban shoh ia utei u paralok shynrang jongka, u la lait phet noh bak na katei ka jaka sha jaka sah briew ha Risa Colony ban pan jingiarap.
Kine ki lai ngut pat kila nang jrong kti ia katei ka thei lud, la ong ka kyrwoh na u SP.
Ki pulit kila pynngat ha Laitumkhrah Police Station Case No. 52(6)2023 U/S 323 IPC R/W Section 7/8/9/10/11/12 POCSO Act. Ar ngut kiba shah kem ki dei na Khliehshnong Malki katba sa uwei ba dang phet rieh yn sa kem suk namar ki pulit kila tip ia ka jaka sah bad ka kyrteng jongu.