SHILLONG, Jylliew: Ka kynhun jong ki samla jong ka Sieng Riti Institute, Wahkhen lyngba ka jingbtin lynti ka Dakti hapoh ka jingialam ka kong Rida Gatphoh kila pyrshang sa kawei ka pyntha ban shna ia ki tiar shna kti kiba dei jong ka rukom u Khasi hyndai. Kane ka jingshna ia kine ki tiar ka long ruh shi bynta ban pynneh pynsah,bad ban kyntiew ia ki jingshan kti kiba ioh na ka mei mariang hapdeng ka jingiabeh ia ka pyrthei juk stad.
Ki jingshna ia ki tiar ban pyniaid iew da ka Dakti ki long ki kriah, ki shang, ki jingter jingtem tynrai, ki jingbuh jingsah pynitynnad ha ki ïing ki sem bad kiwei kiwei.
Ka Dakti hapoh ka jingpeit jong ka kong Rida ka don ka dukan pynia nam ha nongbah Delhi, ha Shillong ban pyniaid iew ia ki.
Ia kane ka kynhun ki samla ka Sieng Riti Institute, Wahkhen kaba dei ka shelm ka put ka tem tynrai, la ialam u bah Rojet Buhphang uba dei uwei u artist uba la ioh ia ka khusnam national award na ka Sangeet Natak Akademi, New Delhi.
Ki dkhot jong kane ka kynhun kynthup samla Pynkhraw Khongwet, Phriasman Majaw, Kioman Marbaniang, Pioneer Pohnong, Colik Majaw, Presland Marbaniang, Konen Khongwet, Hynriewphewsan Khongsni, bah Rojet Buhphang, Shalangkupar Khongwet kila pynpaw ia ka jingkmen ba ka jingthmu ka long shi bynta ban ai kam jam ia ki samla wat ia kito ki bym don ka jingpule hynrei kiba don ka sap tynrai ban shna ia ki tiar bapher bapher.