SHILLONG 05, Jylliew: U Nongialam ka UDP u bah Paul Lyngdoh u la ther ia ka jingpynlong jingiakhih jong u President ka VPP u bah Ardent M Basaiawmoit ba kam long kaba bha ban leh drama ban pynshit ia ki paidbah ban iashun jaitbynriew.
Dang shen, u bah Ardent u la shah thngan haduh khyndai sngi ban dawa bad pynbor ia ka sorkar ba kan pynbeit ia ka Reservation Policy halor ka nongrim ba ka la noh shiliang haduh ban pynduh nong ia ki Khasi.
“Kano kaba pynmyntoi ia ngi, ngim dei ban kyrkaw than shabar, da kaba kyrkaw, da kaba leh drama, ka khring ia ka Kashari ban peit khmat ia ngi, bad mynta da kaba kyrkaw palat, kiwei ki jaitbynriew kum ki Muslim, kiwei ki jaitbynriew ba sah hangne ha jylla ruh kila dawa shaei ka bhah thungkam jong ngi”, la ong u bah Paul.
U la ong ba ka jaitbynriew kam dei ban shu hun tang ha ki ka rit kam ria ne kam sorkar hynrei ka dei ban don ka jingiakhun ban poi sha kyrdan ba shalor. “Nga la iakynduh ia ki Khasi ba trei saiantis nikliar shabar ri ha ri Europe, ngi don u Khasi ba long Chief Election Commissioner ka ri India, ki ong, ong sha shnong jong phi, ki dang iapyrkhat ban long chowkidar seh. Kumno ngin ai mynsiem ia ki samla ban leh bha. Kat ka jingstad jong ngi, ngin tan pynban ia u paidbah ban ieh noh ia ka kam ka jam ban ong ba kane (Reservation Policy) ka dei ka iap ka im jong ka jaitbynriew. Ka kam sorkar ka lait tang kumba 500 tylli eiei haka shi snem, lada iaphiah ngin ia ioh tang mar 150 ngut”, u la ong u bah Paul, bad, “lada ap kam sorkar sa shi hajar snem ruh u Khasi ba la nang la stad um ym ioh kam shuh”.
U la ai jingmut ba ka jaitbynriew ka donkam ban don ka mynsiem iakhun ym ban shu hun ha ki kam peon, tang ban ioh kam sorkar ha ki directorate. “Lada ka jingthmu jong ngi ka long tang ban ioh kam sorkar, kam peon, ngin ioh kam ha directorate, kata ka pynlong ia ngi ban ym kwah ban leh bha, ka pyrthei ka kwah ia ka jingtbit, u nong India u la long Myntri Rangbahduh ha ri Bilat, katba ma ngi, ngi dang kwah ban long Boss tang ha Directorate, kum kata ka jinghikai”, la buh jingkylli u bah Paul.
U la ther ia u nongialam ka VPP, da kaba ong, “Nga la iohi ia ki video ha ka por ba nga kren ia ka Reservation Policy ha 2002. Watla 20 snem mynshwa nga la kren ia ka Reservation Policy, hangno ki video ba kren Reservation Policy u bah Ardent. Ngim shym la thnum ia u bah Ardent wat haba um kren ia ka Reservation Policy”,.
U la ong, “Ki don kiba kylli, balei ngam leit sha jaka shah thngan, ka thong jong nga kum u MLA, ngan pyndep ia ka kam ha ka cabinet, nga la kren ha ka cabinet watla ngam lah ban iathuh ia kaei kaba nga la kren ha ka cabinet namar, lada ngan iathuh, nga pynkhein ia ka kular ia ka jingbam smai kum u myntri”,.
Haba ther ia ka jingpynkhih win jong u bah Ardent ka VPP, da kaba wer ia ki paidbah, u bah Paul u la ong ba kam dei ban shu kiw kiw kaw kaw palat namar ba kan pynioh lad pynban ia kiwei ki jaitbynriew khamtam haba ka kashari ka don hajan. “Ka kam synshar khadar ka long kaba kyntang, kam dei ka jingiakop leh drama, ban pyni mano u dei u Hero, mano ba long Heroin”, la ong u bah Paul.
U bah Paul u la kynthah ruh ia ka jingleh u bah Ardent ba ka long kumba pynshlur ban wanrah ia ka jingsynshar ki paidbhur, ym da ka synshar paidbah. “Ngi hap ban sngewthuh, kijuh ki briew kiba pynlong jingduwai paidbah, kiba ong ban burom ia ki nongsynshar paidbah, lada u klas 8, klas 9, un batai noh ia nga kumno ban shna ain, te ka bha ngan ym leit shuh sha NEHU, ngan neh beit ha klas 8, ne 9 ka la biang. Kane ka dei ka jingpynshlur ia ka jingsynshar paidbhur, ym ka synshar paidbah”, u la ong.