SHILLONG 01, Jylliew: Hadien ba ka sorkar ka la pynbna ia ka jingthaw ia ka Expert Committee ban pule, khmih biang ia ka Reservation Policy, u President ka Voice of the People Party (VPP) u bah Ardent M Basaiawmoit u la sangeh noh ia ka jingshah thngan jong u mynta ka sngi, bad u la leit phai noh sha la ïing.
Ia kane ka rai, u bah Ardent u la pynbna mynta ka sngi ha ka jingsakhi lang ki paidbah byllien ha jaka shah thngan ha phyllaw ka Additional Secretariat, Shillong. Ka jingshah thngan u bah Ardent ka la kot sha ka 220 kynta ha kine ki khyndai sngi ba la leit ban pynbor iaka sorkar ban pynbeit thymmai ia ka Reservation Policy.
Mynta ka sngi u Lat ka jylla u Phagu Chauhan u la pynbna ba la thaw ia ka Expert Committee na bynta ban pule bad khmih biang ia ka Reservation Policy ha ka jylla.
Ka la ong ba ka sorkar ka kwah ban pyntip ba la pynmih ia ka jingpynbna ban thaw ia ka Expert Committee ban pule bniah ia ka Reservation Policy bad kane ka jingpynbna, ka la pyndam noh ia ka Committee halor ka Roster system kaba la pynmih kham mynshwa.
“U Lat ka jylla u la pynbna ba la thaw ia ka Expert Committee ban kynthup ia u chairman, nalor ki stad shemphang na ka tnad ain riti synshar, ka tnad Economic, Sociology, Demographic study bad kiwei ki bynta ba iadei ban pynbna ka sorkar. Ka Committee kan khmih biang ia ka Reservation Policy da kaba pan jingmut na ki kynhun bapher bapher bad ban leit lum jingtip ruh na kylleng ki jaka ha ka jylla”, la ong ka jingpynbna na u Lat.