SHILLONG, Jylliew (PIB): Ka jingkiew ka jingshalan ia ki tiar iada ri jong ka India ka la long kaba bun tam kaba la kiew na ka T. 686 klur ha u snem mang tyngka 2013-14 sha jan T. 16,000 klur ha u snem mang tyngka 2022-23. Kane ka jingkiew kaba 23 shah ka pyni ia ka jingkiew shaphrang ka India ha ka kam pynmih ia ki tiar iada ri. Da ka jingpoi ki tiar sha palat 85 tylli ki ri, ka kam pynmih tiar iada ri jong ka India ka pyni sha ka pyrthei ia ka jinglah jong ka ban saindur bad shna ia ki tiar, ha kaba mynta 100 tylli ki kompani ki shalan ia ki tiar iada ri.
Ban kyntiew shuh shuh ia ka jingshalan ia ki tiar iada ri, ka sorkar ka la shim ia ki sienjam bad wanrah ki jingkylla ha kine ki 9 snem ba la dep. Ia ki kamram ba dei ban pyndep ban shalan tiar la kham pynsuk ha kaba ki jingioh jingbit ki la kham suk bad kane ka la pynduna ia ka jingpynsyrwa kai ia ka por bad ka la pynsuk ban trei ia ki kam khaii.
Shuh shuh, ki sienjam Atmanirbhar Bharat ki la iarap ia ka ri da kaba pynshlur ia ka jingsaindur, jingkyntiew bad jingshna ia ki tiar iada ri ha ka ri. Kane ka la pynduna ia ka jinghap shaniah ha ka jingthied tiar nabar ri. Ka jinglut jingsep ha ka jingthied ia ki tiar iada ri nabar ri ka la hiar na ka 46% jong baroh ki jingpynlut ha u 2018-19 sha ka 36.7% ha u Nohprah, 2022.
Ka India kaba la pawnam mynshuwa namar ka jingthied ia ki tiar iada ri mynta pat ka shalan ia ki tiar bapher bapher kum ki Dornier-228, ki tup, ki Brahmos Missile, ki PINAKA rocket bad ki tup, ki radar, ki simulator, ki kali bad kiwei kiwei. Ka la don ruh ka jingkiew ha ka jingdawa na kiwei kiwei ki ri ia ki tiar ba la shna hapoh India kum ki LCA-Tejas, ki Helicopter, ki jhad kit liengsuin bad ki kam MRO.
Ki Tyllong: 1, 2, Lok Sabha Unstarred Question No. 4861 dated March 31, 2023.