SHILLONG 30, Jymmang: Ka KSU Bangalore ka la kyntu ia ki samla pule kiba mut ban wad admission hapoh ki College bapher bapher ha Karnataka- Bengaluru, ba ki dei ban kylli bha shwa um ban shu shaniah klumar ha ki ksiang (agent) namar la bun ki jingjia ba ki khynnah ki mad ia ki jingeh hadien ba ki la dep ioh admission.
Ka seng ka kyrpad jur ia ki paradoh parasnam ba kin long kiba adkar bad phikir khnang ban lait na ki jingeh.
Kawei pat, ka la ong ba kiba wad kam ban trei ki don ha ka jingeh khlem da tip shaphang ka jingiateh (bond) bad ka soskular jong ka kompeni.
Kine ar tylli ki long ki dawbah ba ki para samla Khasi ki mad ha ki jingeh ha nongbah Bengaluru.
Ka seng ka kwah ia ki samla ban kin pynsaphriang sha kiba haing ba hasem bad sha ki paradoh para snam jongka jylla ba kin tip.
Ha kajuh ka por, ka KSU Bengaluru Unit ka la rakhe iaka jingdap hynniew snem snem kynthih ha R.R Institution Chikkabanavara Bangalore ha ka 28 tarik Jymmang.Ia ka shnat treikam ka seng la seng ha u snem 2016, 28 tarik , Jymmang.
Ha katei ka sngi la shim ia ka bynta symbud kongsan da u Bah Meban Plielad Shadap (FSSAI Inspector) bad ka Kong Mary Tariang (Assistant Professor ) kum ka symbud kongsan.
La ioh ban rakhe ia katei ka prokram da ki jingshad bad jingrwai tynrai.