SHILLONG , Jymmang: Ka myntri khynnah jong ka tnad Social justice ka Pratima Bhowmik ka la kam ba ki kam pynroi ha ka thain shatei lammihngi ka India kila mareh sted bha ha kine ki khyndai snem ba la synshar u Narendra Modi kum u Myntri Rangbahduh ka ri.
Haba kren sha ki lad pathai khubor ha ophis ka BJP ha Shillong, ka Bhomik kala ong ba ka sokar NDA kaba ialam ka BJP ka la pyntreikam ruh bun bah ki skhim na bynta ka jingbit jingbiang bad ban kyntiew ia ka ioh ka kot jong ki nongshong shnong kum ka jan dhan yojna, jan arogya yojna, kisan samman nidhi, digital india, khelo india, jal jeevan mission.
Ka la ong ba tang ka surok la shna 53868 kms tang hapdeng 2014 haduh 2023.
Ka la ong ba naduh ba synshar ia ka ri India ha u snem 2014, u Myntri Rangbahduh ka ri u la pynioh ia ka jingai tika Covid-19 haduh 220 klur khlem jingsiew bad ban pynioh dawai ei, la buh 9300 tylli ki Aushadhi Kendras. La mang bhah kyrpang ruh ia kiba duna ka ioh ka kot ha ki kyrdan pule ba shajrong nalor ka jingai baibam da ki klur sha ki samla pule ha ka ri.
Ka Bhowmik ka la kdew ruh ia ka jingshna ia ki kad liengsuin ha ki jaka bapher bapher ha ka ri ha kine ki khyndai snem. “La shna 111 tylli ki kad khaïi lyngba ki wah ha kine ki khyndai snem ban kyntiew ia ka jingshalan mar lyngba ki wah”, ka la ong.
Halor ka koit ka khiah, ka la ong ba dang shen u myntri rangbahduh ka ri u la plie ia ka AIIMS ha ka thain shatei lammihngi. La pyntreikam ruh ia ka rel Vande Bharat na Guwahati sha New Jalpaiguri ban pynduna ia ka jingbam ka por ha kane ka thain. Ka la ong ba ia ka surok ar liang na Shillong sha Dawki la pyntreikam hapoh ka jingialam u Narendra Modi.