SHILLONG 30, Jymmang: Ka Khasi Jaintia Church Leaders Forum (KJCLF) ka la ong ba ka jingkhih phaloh ka Reservation Policy, ka la sngew ban ai jingiaroh ia ki samla jong ki por ba la leit kiba la aiti kumba ka long mynta wat hapdeng shibun ki jingshah leh shiliang bad ki jingeh jong ka policy.
Ki nongialam ki sngew ba kan long kaba bha, ba hadien san tylli ki phew snem, kane ka policy ka donkam ban khmih biang. “Na bynta ki samla mynta bad ka pateng ban wan, ka long kaba don burom ban pynbeit ia kane ka jingbakla, kaba la shu ieh kumto bad khlem kano kano ka jingpynsngap bad ka jingkhim jingmut ha ki por ba la leit bad kumjuh jong kiba don ha ka bor ba mynta. Namarkata, ngi kyrpad ia ka sorkar bad ki bor ba dei peit, ban pynbeit ia kane kloi katba lah”, la ong u Rev Dr. Edwin H Kharkongor, Secretary, KJCLF.
Ka KJCLF ka la iathir dang shen ia ka jinglong jingman bad ka la sngew khia ia ka jinglong jingman ba dang shen. “Ngi sngew ba kum ki nongialam Khristan dei ban don ka jingsngewthuh ia ka ain bad ban lah ban pynsngewthuh ia ki dkhot halor ki mat kiba ktah ia ki kam bad ki jingleh ha ka jingngeit jongki bad kumjuh ia ki mat ba ktah ia ka imlang sahlang. Ngi kyntu ia ki nongialam Balang bad ki shlem ban pynlong ia ka jingai jinghikai halor kine ki mat na ka por sha ka por”, la ong u Rev. Dr. Kharkongor.
Ka KJCLF ka la kyntu ia ki Khristan ka thain ban duwai lem ba ka jingsuk kan wan phai biang ha jylla Manipur bad ban iarap kyrkieh ia kiba shah ktah ha ka jingiakynad.