SHILLONG 30, Jymmang: Ha ka 28 tarik u Jymmang 2023, ka Seng Khasi Ri Raij Laban, ka la ioh ban pyllait paidbah ia ka thup poitri ba la ai kyrteng ia ka “Poitry Ki Sur Myllung Na Ki Khuiñ Ka Dohnud”, ba la thoh da kong Bakhiamon Rynjah .
Ia kane ka kot la pyllait paidbah ia ka da u President ka Seng Khasi Ri Raij Laban u Rgh I. Sun bad sakhi da ki para riew Seng Khai, kiba la poi sha kane ka jingialang kaba dei artad haka por ba la pynlong ia ka Seng Pyni kaba shi sien shi taiew, ha ïing seng ba don ha Lum Shat Sngi bad la synran lang ia kong Bakhiamon da ki hynmen, ki para, ki khun bad kiwei kiwei.
Na ka liang u Rgh I Sun, President Seng Khasi Ri Raij Laban u pynpaw ia ka mynsiem kaba sngew sarong ba un ioh ia ka bynta ban pyllait ia kane ka thup poitri ba la thoh da kong Bakhiamon Rynjah kaba dei kawei na ki riew trei mon sngewbha naka bynta ka seng.
Kane kan dei artad ka sien ba nyngkong ba ka Seng Khasi Ri Raij Laban ka ioh ia kum kane ka kabu ksiar ban pyllait paidbah ia ki kot kaba jia ryngklhat ba na ka liang ka nongthoh katta ka kong Bakhiamon I da kwah eh ruh ba mynta ka kynti ia kane ka kot thup poitri ban pyllait paidbah ha iing jong ka Seng Khasi Ri Raij laban.
U Rgh I Sun u pynpaw ruh ba haba u khmih shaphang kane ka thup poitri, u iohi ba don shibun kiei kiei kiba iadei bad ka mariang ryngkat bad ka niam.
Na ka liang kong Bakhiamon haka jingbatai ba lyngkot ka jong I shaphang kane ka thup Poitri, I la pynpaw ba I la thoh bun tylli ki phang ba iadei bad ka mariang, ka jinglong bad ka jingim ki briew, ka sneng ka kraw, khana pateng ba iadei bad ki shnong ki thaw.
Ki jingthoh ba iadei bad ka niam ka kynthup ia ka jinglong bad ka jingim briew ka maian Blei, ha kawei na ki ballad, I kong Bakhiamon I iathuh ba I la thoh shaphang ka Umkhluit kaba don ha Jakrem, kaba hangne ruh I sngew ban pynpaw ba hangne ka don ka bor Blei.
Ha kane ka kot ki poitri ba kong Bakhiamon I la thoh baroh ki long 34 tylli bad kiba kham paw ki long Ka Shnong langkyrdem, Ka ILP, U Omikron, Ka Juk Online, San Phew Snem Seng Kur Rynjah bad I la pynkut ia kane ka thup da ka poitri da ka Samoi Ilekshon.