SHILLONG 27, Jymmang: Sa shisnem ba ka ri India kan sakhi biang ia ka Lok Sabha Elekshon ha u 2024, ka Congress ka la ther ia ka sorkar BJP kaba ialam u Narendra Modi kaba dap 9 snem ban synshar ha ka ri ba ka la shu thok shu thak ia ki paidbah ka ri.
Ka nongialam ka AICC ka Barbeeta Sharma, haba kren mynta ka sngi, ka la kynnoh ba ha kine ki khyndai snem, ka sorkar BJP ka la thombor ia ki paidbah baduk bad ka plie lad tang ia kiba riew spah. “Ka sorkar u Modi ka dap Khyndai Snem, ka Congress ka buh Khyndai Jingkylli”, la ong ong ka Barbeeta.
Ki khyndai tylli ki mat ba ka Congress ka buh jingkylli ki long balei ka jinghiar dor ka pisa, ka jingkiew ka jingbym ioh kam ioh kam, ka jinghiar ka ioh ka kot ha kaba kiba duk nang duk katba kiba riew spah ki nang duk. Kabar ka long balei ka sorkar kam shym la pyndep ia ka jingiateh bad ki nongrep, haei ka jingkamai ki nongrep ka la kiew ar shah. Kaba lai, balei buh ia ka pisa jong ki paidbah ha ki LIC bad SBI ha ka jingma, balai la aijem ia ki nongtuh. Kaba saw, balei u Modi um ju kren eiei ia ka jingkyntur ka China ia u pud u sam ka India, kaba san balei u pynkharoi ia ka politik jingisih, bad jingkren sinew tang ban ioh vote ban wanrah ka jingsyier ia ka imlang sahlang. Kaba hynriew, balei ka sorkar ka pyntroin ia ka imlang sahlang, balei ka sngap ia ka jingthombor ia ki ST, SC, OBC, balei ym leh ia ka khanasumari ia ki jait bapher bapher. Kaba hynniew balei la kput ia kiba ialeh pyrshah bad thombor ia ki sorkar bym dei na ka BJP, balei la pynsniew dur ia ka imlang sahlang. Kaba phra, balei ia ki skhim ia kiba duk, kiba sahdien la pynduna bad pyrkhing bad kaba khyndai, balei wat hadien ba la iap 40 lak na u Covid-19, ka sorkar u Modi kam shym la iarap eiei ia ki longïing.
“Ki paidbah ka India ki kynmaw ia ki jingkular ka BJP, ban ai 15 lak tyngka sha man ka account, 2 klur ki kam man ka snem ia ki samla, bad ki jingkular bym kut shuh, hynrei shaei kine”, la buh jingkylli ka Barbeeta.
Ka la kynnoh ba kane ka sorkar BJP ka dei kaba bamsap, ka la pynkiew dor ia ki marbam mardih, ka jinghiar ha ka ioh ka kot, bad kiba bun ki jingktah ia u paidbah bym lah shuh ban niew.