SHILLONG 27, Jymmang: Lada ngi iakren ia ka jingkoit jingkhiah jong ki kynthei, kaei ka rta kaba biang ban shim jingsumar bha?, hato ka dei naduh dang khynnah ne hadien ba la samla ne ha ka por ba ki kha ki pun?, Kine ki dei ki jingkylli kiba la pynsngew jong ki nongiashim bynta ha ka jingiathir halor ka jingkoit jingkhiah jong ki kynthei kaba la long dang shen ha Assam, Administrative Staff College, Guwahati.
Ia kane ka jingiathir la iathir halor katei ka phang ba la pynlong ka National Commission for Women (NCW) ryngkat ka jingiatreilang bad ka Assam State Commission for Women (ASCW) bad ka Women and Child Development (WCD) Department, ka sorkar Assam.
Ha kane ka jingiathir la ioh ia ka jingkren na ka dkhot ka National Commission for Women ka kong Delina Khongdup kaba dei na ka jylla Meghalaya, nalor u Keshab Mahanta, u myntri ka tnad ka koit ka khiah ka sorkar Assam, u Principal Secretary ka tnad ka koit ka khiah ka Assam, ki nongmihkhmat na ki jylla, na ka tnad Social Welfare, na ka tnad ka koit ka khiah jong ki 6 tylli ki jylla ka dong shatei lammihngi ka India.
Nalor kine, la wan iashim bynta ruh ki nongmihkhmat na ki kynhun bapher bapher kynthup na ki ophisar na ki district jong ki tnad sorkar bapher bapher ka sorkar Assam, ki riew pule, ki samla pule, ki nongmihkhmat na ki seng ba kyrshan ka UN, ki nongmihkhmat na ki seng treimon sngewbha kynthup ki ASHA, ki nongtrei Aganwadi bad kiwei.
Ki nongkren khamtam na ka dkhot ka Commission, ka kong Delina ka la pynsngew ia ki jingdonkam ban sumar ia ki kynthei ym tang ia ka jingkoit jingkhiah ka met ka phad hynrei ka jingkhlain jong ka bor jabieng ruh kumjuh bad kiwei pat ki mat kumno ban weng ia ki jingeh ba iadei bad ki kynthei.