SHILLONG 26, Jymmang: Ka Meghalaya Board of School Education ka la pynbna ia ki artylli ki result ha ka sngi Thohdieng ba kynthup ia ka Higher Secondary School Leaving Certificate bad ka Secondary School Leaving Certificate.
Ha kane ka kynti kaba mynta, ha ka kyrdan pule jong ka Higher secondary School Leaving Certificate, ki samla ba la iakhun baroh ki long 25437, bad kiba la pass ki long 20425 bad ka percentage ka long 80.30.
Lada phai pat sha ka Secondary School Leaving Certificate, ki samla ba la iakhun baroh ki long 51280, kiba pass ki long 26629 bad ka pass percentage pat ka long 51.93.
Na ka liang u Jt. Director ka Meghalaya Board of School Education u bah M. Marbaniang, u iathuh ba lada ia nujor bad u snem uba la dep, u kubur ba ka don ka dak jong ka jinghiar ha ka percentage jong ka jinglait ki khynnah ha kane ka snem ba mynta.
Tang kum ka nuksa, u bah Marbaniang u la pynpaw ba ha ka SSLC, ka pass percentage ka long haduh 56.96 percent, lada phai pat sha ka kyrdan jong ka Higher Secondary ka pass percentage u snem ba la dep ka long 81.17 .
U Bah Marbaniang u ong ba lada khmih bniah biang, ka daw ba kham bun ki samla kiba phiel ki dei kito ki samla kiba la iakhun biang sa shi sien.
U la ai mynsiem ia kum kine ki khynnah ba kampher wat lada ki la phiel biang mynta u snem, hynrei u kyntu ia ki ba kin trei shitom bad kham pynleit jingmut noh ha u snem u ban.
Sa kawei pat ka mat ba u bah Marbaning u la pynpaw ka long ba na ka 656 tylli ki recognize ne affiliated school kumba 99 tylli ki skul ki skul ki la ioh ban kheit ia u soh ba thiang jongki hadien ba ki khynnah ba pule ha kum kine ki skul ki la pass lut kaba mut shispah na ka shispah percent ka jinglait ha ka Secondary School.
Haba iadei pat bad ka jinglait ki samla ha ka kyrdan ka Top 20, u bah Marbaniang u pyntip ba mynta ka snem ki don baroh haduh 52 ngut.
Hadien ba ka Meghalaya Board of School Education (MBoSE), ka la pynbna ia ki artylli ki result ba dang sah jongka, ba kynthup ia ka Higher Secondary School Leaving certificate bad ka secondary School leaving Certificate 2023, na ka jingphiah jongka ia ki result ha baroh ki district ba don ha ka jylla Meghalaya, kaei kaba lah ban lap ban shem bad ban iohi hi ka long, ba ki samla pule ba dei napoh ri lum Garo, ki iai pynpaw ia ka jingsahdien jong ki bym lah ban pass bun ngut ha kane ka kynti kaba mynta.
Haba ia kaba iadei bad kane, la ioh ban iakren bad u Jt. Director ka Meghalaya Board of School Education u bah M. Marbaniang ha kamra treikam jongu u la pynpaw ba lada tih bniah bha ia ka daw, ka long ba kiba bun na ki khynnah ba ong ha ka ktien phareng ‘first generation learner’.
Shuh shuh u bah Marbaniang u la bynmrap ruh ba lehse ka rukom pynkhreh na ka liang ki khynnah ruh kam da biang namar ba lehse ki lah ban kham khein sting. Bynrap lang sa ka jinglah ban shim sting wat na ka liang ki nonghikai.
Haba iadei bad kane, u bah Marbaniang u la ong ba yn sa pyrshang ban pynbeit ia kane khnang ba ha ki snem kiban wan lehse ki khynnah na kane ka ri lum kin lah ban nang kham leh bha.
Haba jubab pat halor ka jingkylli hato ka don ne em ka jingktah ia ki khynnah mynta ka snem ia ka jingpynkhreh jongki ia ki eksam namar jia ryngkhat ba ka jylla ka la dep ban leit sha ka elekshon, u bah Marbaniang u kubur ba kane ka lah ban don beit ka jingktah katno tam lei lei ha ka por ba la sdang ban kham shongshit bha ka jingiaid ialap, ha kaba ki shnong ki thaw, ki lynti ki syngkien la shu sawa jam beit tang da ki kor pynsawa.
Hynrei ha ki khynnah kiba im sngi bad kut jingmut lehse ia kum kine ki jait kam kin nym da pynshah shkor than eh namar ki la dep pat ban long kiba la pynkhreh lypa.