SHILLONG, Jymmang: U president ka Ka Synjuk Nongsynshar Shnong Ka Bri U Hynniewtrep (SNSBH) u bah RL Blah u la ong ba kan bha ban ym shaniah than ha ka bhah hynrei kum ki samla ki dei ban don ka mynsiem iakhun bad ban shim kabu ia ka jingdon ka bhah thungkam bad bhah pule.
Haba kren mynta ka sngi, u bah Blah u la ong ba ka jaitbynriew ka la kham kiew bha mynta ha kaba ki don kiba lah ban iakop wat bad kiwei kiba nabar bad kane ka dei ka burom ia ki samla. U la ong ba ka jingmang bhah ka lah ban ym neh slem bad kumta la kyntu ia ki samla ba ki dei ban shim kabu na ka jingdon ka bhah thungkam hynrei ki dei ban don ka mynsiem iakhun ban pynpaw ha ka pyrthei India ba kum ka jaitbynriew kaba rit hynrei ki don ki khraw jabieng.
“Ka Synjuk Nongsynshar Shnong Ka Bri U Hynniewtrep, ngi buh ka jingkyntu sha ka bri u Hynniewtrep ba baroh ki longkmie longkpa ba hooid, ka don ka bhah hynrei ha kajuh ka por ngi hap ban mih da ka sap, ngi sngew sarong kum ka jaitbynriew ha kine ki snem, ka jingiakop kam dei bad kiwei ki jaitbynriew, ka jingkiew jong ki khynnah pule ka la nang kiew, bad ka long ka burom ba ngi lah ban wan ha ka general list”, u la ong.
Ha kajuh ka por, u la bynrap “Ka reservation kam ym neh slem junom la junom, pateng la pateng bad ka long ka jingkyntu kynpham, watla ngi shim ia ka kabu ngin pyndonkam ia ka bhah pule hynrei ngi dei ban don ka mynsiem ban iakhun ba ngin pynpaw ha ka pyrthei bad ha ka ri ba kum ka jaitbynriew watla ngi long kiba rit hynrei ngi don ki khraw jabieng ban iakhun bad kiwei ki jaitbtnriew heh paid”.
Ha ka jingialang, ka Synjuk ka la thaw ruh ia ka Core Committee ban pynkhreh ban ai jingmut sha ka sorkar halor ka Roster system lada ka khot ban iakren halor kane.
U President u la ong ba la ioh jingtip ba ka sorkar ka lah ban khot jingialang ha ka 26 tarik mynta u bnai ban iakren halor ka Roster system bad ka synjuk ka hap ban pynkhreh lypa ban leit iakynduh lada kan wan ka jingkhot na ka sorkar. U la ong ba ia mynta ym pat lah ban ong eiei halor ka Roster namar ba kim pat ioh ia kano kano ka jingshai halor kane.
“Ngi la iashong mynta ka sngi bad la thaw ia kawei ka Core Committee ban pynkhreh ban leit ia ki jingmut, lada wan ka jingkhot”, la ong u bah Blah.
U la ong ba kiba bun ki nongsynshar shnong kim pat peiphang ia kane ka Roster bad ki donkam ban ioh shwa ia ka jingshai. “Kiba bun ki nongsynshar shnong kim dei kiba trei kam sorkar bad kim tip ia kata ka Roster system bad na ka liang u Myntri Rangbah u la kular lada khot ia ngi, yn ai shwa ia ka jingbatai bad dei tad ha kata ka por ban ngin sa sngewthuh ba kumno ban iaid shakhmat bad ia mynta ngim pat shim kano kano ka rai”, u la ong bad bynrap, “ngi shim tang ia ka rai ban thaw ia ka Core Committee lada ki khot bad lada kim khot ruh ban pynkhreh lypa ialade”,.