SHILLONG 23, Jymmang: Sa shi taiew tam ba kan don ka jingiakren katkum ka rukom bad ki sorkar, ki nongialam ka seng Hynniewtrep National Liberation Council (HNLC) mynta ka sngi, kila mih pyrthei ban kren sha ki lad pathai khubor.
U Vice Chairman ka HNLC u bah Manbhalang Jyrwa ha ka jingdon lang u ksiang u bah Sadon K Blah bad kiwei, u la ong, “Ka HNLC ka la dap 35 snem ha ka jingialeh ia ka sorkar, ka ieng beit ha ka nongrim ka Hynniewtrep Nationalism ne ka jingieid ia ka jaitbynriew Hynniewtrep, ban iada ia ka, la ka dei hapoh ka Riti synshar ka ri India ne habar ruh kam lei lei tangba, dei ban ioh ia ka jingithuh kum ka jaitbynriew.
U la ong kum ka jaitbynriew Khasi ka lah ban jah lada kam don ka jingithuh kaba kyrpang namar ba ki Mizo ki don ka Mizoram, ki Naga ki don ka Nagaland, ki Manipuri ki don ka Manipur, hynrei ka jaitbynriew Khasi kam pat don ka jingithuh ba kyrpang.
“Ka jingwan iakren jong ngi kam dei ka jingwan pyndem shane, ka jingwan jong ngi shane ka long ba ngi kwah ban iakren bad ka sorkar India bad ka sorkar jylla ban pynbeit ia kine ki kynrum ki kynram”, u la ong, bad kyrmen ba ka jingiakren kan mih soh watla ka lah ban slem.
Ka HNLC kam dei ka seng kaba pyrshah ia ka ri India ne kaba pyrshah ia ki heh paid ne ki rit paid, kam dei kaba pyrshah ia ki Muslim ne ki Hindu hynrei kum ka seng ka ieng ha ka hok bad ka jingshisha.
U Ksiang ka seng u bah Sadon K Blah u la ong ba ka jingiakynduh mynshwa bad ka sorkar ka long ban ai lad laitluid ia ki nongialam ka seng ne ka amnesty khnang ba ka jingiakren kan iaid beit ha kaba ki dkhot kin lah ban rung ban mih laitluid.
Katkum ka jingong ki nongialam ka seng, ki mat kum ka ILP, khappud, jingma ia ka jaitbynriew, ki jingshah thombor bad ka Instrument of Accession, nalor kiwei kin dei ki mat ha ka jingiakren bad ki sorkar.
Ha kane ka sngi, la don lang u Political secretary bah Aristar Thongni, bah Storgy Lyngdoh u PSO, bah Raymond Lapang, PSO nalor ki dkhot ka HNYF.