SHILLONG 23, Jymmang: Ka sorkar MDA-2 ka la ai kam haduh 27 ngut ki politishian ha kane ka kynti hadien ar bnai tam ba ka la don ha ka sorkar bad kine ki dei ki MLA kiba la rem elekshon bad ki nongialam seng sain pyrthei.
Haba kynthah jur ia ka jingpynlut phut ka sorkar ia ka pisa khlem phoida eiei, mynta ka sngi u general secretary ka HYC u bah Roy Kupar Synrem u la ong ba ha kane ka sorkar MDA-2 ka la thung 21 ngut ki chairman, deputy chairman, co-chairman bad ki dkhot ha ki Board, Commission, Corporation, Council bad dang mynta ka sngi ka la thung shuh sa 6 ngut.
“Ka sorkar MDA-2 ka la thung 21 ngut kham mynshwa ia ki politishian, ki briew ka parti ha kine ki Board, Commission, Corporation, Council bad mynta sa 6 ngut”, la ong u bah Roy.
“U MLA barim ka Nongstoin, u la shah thung kum u co-chairman ka Economic Development Council katba kiwei kila shah thung ha ka Employment Generation Council tang ban pynsyrwa kai ia ka pisa u paidbah”, la kynnoh u nongialam ka HYC.
U la ong ba lada donkam ban thung briew ha ki Commission, committee, dei ban siew katkum ka kam ba ki leh, ym ban shu thung ban pynlut kai ia ka pisa jong u paidbah. “Ki don ki komiti kiba donkam ym dei ba pyrshah lut, kum ka Law Commission, ka State Planning Board ki donkam” u la ong, bad u la bynrap, “Ka seng ka lah ban leit tied jingkhang sha ka kashari ruh ban pynpei shkor ia ka sorkar lada ka bteng ia kane ka jingleh”.